Ադոլֆ Հիտլերին էլ կանցնեք. ՀՀԿ-ականը՝ Նիկոլ Փաշինյանին

ԱԺ նիստում, երբ քննարկվում էր գլխավոր դատախազի` 2014թ. գործունեությունը, ՀՀԿ-ական պատգամավոր Սամվել Ֆարմանյանը նախ հռետորական հարց հնչեցրեց, թե ի՞նչ էր ակնկալում Գևորգ Կոստանյանից Ազգային ժողովը: Նա նշեց, որ ոչ միայն Հանրապետական կուսակցության, այլ նաև գլխավոր դատախազի համաձայնությամբ է տեղի ունեցել ԱԺ կանոնակարգ-օրենքի փոփոխությունը, որ այսուհետ գլխավոր դատախազը կարող է գալ ԱԺ և իր գործունեությունը ամփոփել:

«Մի՞թե մենք սպասում էինք, որ գլխավոր դատախազի պաշտոնավարման մեկ տարվա ընթացքում պետք է լուծեր համակարգային այնպիսի խնդիրներ, ինչպիսիք են կոռուպցիան, ընտրախախտումների ամբողջական բացառումը և այլն»,- ասաց պատգամավորը՝ դիմելով Նիկոլ Փաշինյանին. «Եթե ժեստիկուլյացիայով խոսելու վիճակագրություն երբևէ կազմվի, Դուք առաջ կանցնեք նույնիսկ պատմության մեջ այդ հարցում առաջին տեղը գրաված Ադոլֆ Հիտլերից: Հետևաբար, պետք է քննարկել բուն դատախազության գործունեությանը առնչվող հարցեր»,- ասաց պատգամավորը:

Սամվել Ֆարմանյանը հորդորեց որոշ պատգամավորներին` ազնիվ լինել ու չզբաղվել թատերական ներկայացումներով: «Այսօր դատախազության համակարգում համակարգված կոռուպցիա գոյություն չունի: Մաղթում եմ Գևորգ Կոստանյանին` ուշադրություն չդարձնել մանր թատերական ներկայացումներին, որովհետև դրանք պատմության փոշու տակ մոռացվելու են»,- ասաց նա: