ՀՀ-ում գործող կրոնական կառույցների բիզնեսներն ու գործունեության տարածքը

Տեղեկացրել ենք, որ այսօր, ՀՅԴ Երևանի քաղաքային կոմիտեի նախաձեռնությամբ, տեղի ունեցավ «Հոգևոր անվտանգություն. մարտահրավերներ, խնդիրներ» թեմայով կլոր սեղան-քննարկում:

Քննարկման ժամանակ «Քայքայիչ պաշտամունքներից տուժածների օգնության և վերականգնողական կենտրոնի» տնօրեն Ալեքսանդր Ամարյանը նշեց, որ կրոնական կառույցներից շատերը հարմար տեղավորվել են Հայաստանում, և այսօր, օրինակ, Մեծամորն «իրենցով են արել» Եհովայի վկաները: Նրա հավաստմամբ` Մեծամորի ատոմակայանի աշխատակիցների շրջանում մեծ թիվ են կազմում Եհովայի վկաները, և եթե նրանք որոշեն երկրի ներսից ինչ-որ բան անել` հետո ինչպե՞ս ենք տակից դուրս գալու: Ամարյանը տեղեկացրեց նաև, որ Եհովայի վկաները Հայաստանում ոսկու բիզնեսով են զբաղվում:

«Իսկ մորմոններն այնտեղ են, որտեղ կա էլիտա և ռազմաբազա` Մեղրիում, Գյումրիում և Արտաշատում: Մորմոնները հյուրանոցային համակարգն ու աուդիտն են իրենցով արել. գաղտնիք չէ, որ «Մարիոթը» պատկանում է նրանց: Ավետարանչական կառույցի ներկայացուցիչներն էլ ակտիվ ձևով ընդգրկված են մեր քաղաքական դաշտում: Ի դեպ, օրենքի համաձայն` նրանց գույքը պատկանում է ԱՄՆ-ին, իսկ գիտեք` ի՞նչ են անում նրանք` Հայաստանում հող են գնում` Վանաձորում, Արտաշատում և Գյումրիում: Չի բացառվում, որ տարիներ անց ԱՄՆ-ը կարող է ներխուժել Հայաստան` սեփականության պաշտպանության «նկատառումներով»»,- ասաց Ամարյանը: