25 գազալցակայանները, որ հանել եմ, դրանց հետևում էլ թույլիկ մարդիկ չէին կանգնած. Արմեն Երիցյան

ՀՀ տարածքային կառավարման և արտակարգ իրավիճակների նախարար Արմեն Երիցյանը լրագրողների հետ զրույցում անդրադարձավ վերջին շրջանում գազալցակայանում տեղի ունեցած պայթյուններին: Նախարարը նշեց, որ վարչապետի հանձնարարականից հետո ստեղծվել է խումբ, որը երկուշաբթի օրվանից ստուգումներ կիրականացնի բոլոր գազալցակայաններում:

«Ստուգումներ եղել են, խախտումներն արձանագրվել են, տուգանքները եղել են մինչև մեկ միլիոն: Սա պետք է շարունակենք, և մարդիկ պետք է հասկանան, որ ավելի լավ է մի քիչ գումար ծախսեն, որպեսզի այդպիսի դեպքեր չլինեն»,- ասաց նախարարը: Հարցին, թե պետք է նման դեպքե՞ր լինեն, որ ստուգումներ իրականացվեին, նախարարը պատասխանեց. «Ստուգումներ պարբերաբար կատարվում են, ստուգումների հետևանքով եղել են տուգանքներ, և այն բացթողումները, որ կան, ներկայացվել են, բայց մարդիկ անփույթ են լինում»,- ասաց Երիցյանը` հավելելով, որ տարվա ընթացքում մեկ անգամ են գազալցակայանններում ստուգումներ իրականացվում: Հարցին, թե տուգանքները մուծելուց հետո գազալցակայանները կրկին շարունակո՞ւմ են իրենց գործունեությունը, Արմեն Երիցյանը պատասխանեց. «Ոչ, տուգանքը մուծում են, այդ խախտումները, որ կան, պետք է վերացնեն»:

«Եթե հիշում եք, ես նոր էի նախարար նշանակվել, և մայրաքաղաքից մենք հանեցինք շարժական գազալցակայանները: Ծանր էր, բայց մենք կարողացանք այդ 25 գազալցակայանները հանել, և կարծում եմ, որ ԱԳԼՃԿ-ներում եթե տեսնենք ստուգումներից հետո խախտումներ, մենք կարգելենք նրանց հետագա գործունեությունը»,- ասաց նախարարը:

Այն հարցին՝ չէ՞ որ դրանցից շատերը պատկանում են վարչապետին և Գագիկ Ծառուկյանին, արդյոք կարո՞ղ է նախարարը նրանց դեմ գնալ, Արմեն Երիցյանը պատասխանեց. «Ես չգիտեմ՝ ում է պատկանում: Այն 25-ը, որ հանել եմ, այդ 25-ի հետևում էլ թույլիկ մարդիկ չէին կանգնած։ Կարծում եմ՝ եթե օրենք է, օրենքը բոլորիս համար է»,- ընդգծեց տարածքային կառավարման և արտակարգ իրավիճակների նախարարը: