Չեմ կարծում, որ կսպանեն. Սյունիքի փոխմարզպետը՝ Սուրիկ Խաչատրյանի մասին

Այսօր ԱԺ բյուջեի կատարողականի քննարկումներին ներկայացել էին բոլոր մարզպետերը, բացի Սյունիքի մարզպետ Սուրիկ Խաչատրյանից, թեև նա Երևանում էր: Ներկայացել էր նրա տեղակալը, որին էլ լրագրողները ուղղեցին իրենց հարցերը:

Հարցին, թե իրեն պատիվ բերո՞ւմ է Սուրիկ Խաչատրյանի հետ աշխատելը, Սյունիքի մարզպետի տեղակալ Վաչե Գրիգորյանը պատասխանեց. «Շատ մեծ պատիվ է բերում»:

Իսկ հարցին` չի՞ վախենում, որ մի օր էլ իր վրա կկրակեն, արձագանքեց. «Ինչի՞ պետք է ինձ ծեծեն, կամ ո՞ւմ մտքով պետք է նման բան անցնի»:

Հարցին, թե մարզում լարված չէ՞ վիճակը, փոխմարզպետը պատասխանեց, որ ոչ մի լարված վիճակ էլ չկա մարզում, նաև չկա ոչ մի վտանգ: «Լարվածությունն այն օրերին էր, երբ այդ դեպքերը կատարվեցին, բայց այսօրվա դրությամբ լարվածությունն անցել է»:

Հարցին, թե  հնարավո՞ր է մեկի ուղղությամբ առնվազն քսան անգամ կրակել, բայց ոչ մի վնաս չհասցնել, Գրիգորյանը պատասխանեց, որ ինքը մասնագիտական կարծիք չի կարող հայտնել:

«Իսկ Խաչատրյանը մտավախություն չունի՞, որ իրեն կսպանեն» հարցին փոխմարզպետը պատասխանեց. «Չեմ կարծում, որ իրեն կսպանեն»:

Հարցին` ինչպե՞ս է վերաբերվում այն բանին, որ Խաչատրյանի որդին անընդհատ տարբեր տհաճ իրադարձությունների կիզակետում է հայտնվում, պատասխանեց, որ դա ընտանեկան հարց է, և ինքը չի կարող միջամտել: