Ինչո՞ւ ներում շնորհվեց Սուրիկ Խաչատրյանի հարազատներին

Այսօր ԱԺ-ում, երբ ՀՀ նախագահի աշխատակազմի ղեկավար Վիգեն Սարգսյանը ներկայացնում էր 2014թ. բյուջեի կատարողականը, «Ժառանգություն» խմբակցության պատգամավոր Զարուհի Փոստանջյանը հարց ուղղեց նրան: «Որքա՞ն դատապարտյալի է ներում շնորհվել, և ինչո՞ւ ներում շնորհվեց Սյունիքի մարզպետ Սուրիկ Խաչատրյանի մերձավոր հարազատներին»,- հարցրեց պատգամավորը:

Վիգեն Սարգսյանը պատասխանեց, որ ինչ վերաբերում է անհատական ներումների շնորհմանը, ապա որևէ դրդապատճառ երբևէ չի բացատրվում, դա անձին վերաբերող խնդիր է, և նախագահի բացառիկ լիազորությունն է ներում շնորհելը, հետևաբար, այդ գործառույթը իրականացնելիս չկա լրացուցիչ պարզաբանման անհրաժեշտություն:

«Գործում է հասարակական և խորհրդատվական խումբ, որը յուրաքանչյուր դիմում նախօրոք քննարկում է, և ներման յուրաքանչյուր խնդրանք զեկուցվում է նախագահին»,- ասաց նախագահի աշխատակազմի ղեկավարը:

Ըստ նրա` ներումների ընդհանուր քանակը տարվա կտրվածքով չի գերազանցում 15-20-ը: