Բաքվում հանում են Իլհամ և Հեյդար Ալիևների դիմանկարով պաստառները

Բաքվում հավաքում են նախկին և ներկա նախագահներ` Հեյդար և Իլհամ Ալիևների մեծ դիմանկարները, որոնք տարիներ շարունակ եղել են քաղաքի բոլոր մայրուղիներում ու հրապարակներում՝ գովազդային վահանակների վրա: Այդ մասին հայտնում է contact.az-ը:

Նշվում է, որ հավաքում են նաև նրանց խոսքերն ու հայտնի արտահայտությունները, որոնք ստորգետնյա անցումների պատերի վրա էին՝ ոսկյա տառերով:

Պատճառները հայտնի չեն:

«ԶԼՄ-ների համապատասխան  հարցին  շրջանների գործադիր իշխանությունը հրաժարվում է պատասխանել: Ադրբեջանի դեպքում զարմանալի չէ, որ ինքնակառավարման մարմինները հրաժարվում են պատասխանել լրագրողների հարցերին: Սա բացառություն չէ, այլ օրենք: Կարելի է ենթադրել, որ  այդ քայլի պատճառը 2015-ի ամառային Եվրոպական խաղերն են, որոնք տեղի են ունենալու Բաքվում հունիսի 12-28-ը: Իշխանությունը, երևում է, սկսել է հասկանալ, որ նախագահի դիմանկարների և ցիտատների նման առատությունը զգալիորեն հակասում է ժողովրդավարական և բարգավաճող Ադրբեջանի իմիջին, որը ներկայացվում է աշխարհին»,- գրում է պարբերականը: