Այս տարի լավ բերք կլինի. գյուղնախարարը խոստանում է

Գյուղատնտեսության նախարար Սերգո Կարապետյանն այսօր՝ մայիսի 12-ին, մեկնել է Արագածոտնի մարզպետարան, որտեղ անցկացվել է մեղվաբուծության ոլորտին նվիրված խորհրդակցություն: Միջոցառմանը ներկա էին նաեւ  Արագածոտնի մարզպետ Սարգիս Սահակյանը, Հայաստանի մեղվաբույծների ազգային ֆեդերացիայի նախագահ Ռոզա Ծառուկյանը:

Բացելով խորհրդակցությունը` նախարարն իր ողջույնի խոսքում ամփոփել է  վերջին մեկ տարվա ընթացքում ՀՀ գյուղատնտեսության նախարարության կողմից իրականացված աշխատանքները եւ դրանց արդյունքները: Մասնավորապես անդրադառնալով գյուղատնտեսության ոլորտին հատկացվող պետական աջակցության ծրագրերին` նախարարը նշել է, որ պարարտանյութերի եւ դիզելային վառելիքի բաշխման գործընթացը դեռեւս ընթացքի մեջ է, եւ գյուղացիական տնտեսություններն  անհրաժեշտության դեպքում կարող են լրացուցիչ հայտեր ներկայացնել:

Նախարարը տեղեկացրել է, որ ծրագրի շրջանակում պարարտանյութերը  հողօգտագործողներին տրամադրվում են մատչելի գներով` 1 պարկ (50 կգ) ազոտական պարարտանյութը հողօգտագործողներին տրամադրվում  է 6000,  իսկ կալիումական եւ ֆոսֆորական պարարտանյութերը` 7000 դրամով: Դիզելային վառելանյութը հողօգտագործողներին տրամադրվում է 1 լիտրը 350 դրամ  վաճառքի արժեքով, 1 հեկտարի համար մինչեւ 200 լիտր նորմայով: Սահմանված առավելագույն քանակը 600 լիտր է: Նախարարի խոսքով` գյուղատնտեսությունը հանրապետությունում վերջին տարիներին դինամիկ զարգացում է ապրում` ապահովելով միջինում 7,5 տոկոս աճ եւ  զարգացման մեծ ներուժ ունի:  Նախարարի հավաստմամբ վերջին տարիներին հանրապետությունում ավելացել է  անասնագլխաքանակը, այդ թվում` նաեւ Արագածոտնի մարզում, ժամանակին իրականացվում են գյուղատնտեսական կենդանիների պատվաստումները:

 Ընդգծելով, որ տարին բարենպաստ է եւ հատկապես պտղի ու խաղողի բարձր բերք է սպասվում`  Սերգո Կարապետյանը եւս մեկ անգամ հավաստել է, որ մթերումները կիրականացվեն ամբողջ ծավալով, պետությունը կաջակցի  վերամշակող ընկերությունների խնդիրների լուծմանը  եւ կհետեւի, որպեսզի մթերումների գործընթացը պատշաճ  եւ ժամանակին կազմակերպվի: Հաշվի առնելով հանրապետությունում դիտվող խոնավ եւ տաք եղանակային պայմանները` նախարարը խորհուրդ է տվել գյուղացիներին անպայման բուժման աշխատանքներ կատարել կորիզավոր պտղատեսակների հիմնական վնասատուների եւ հիվանդությունների դեմ, քանի որ նման եղանակային պայմանները նպաստում են մի շարք սնկային հիվանդությունների բուռն զարգացմանը:

Նախարար Սերգո Կարապետյանը հայտնել է նաեւ, որ ՀՀ վարչապետի հանձնարարությամբ Հայաստանի մեղվաբույծների ազգային ֆեդերացիայի նախագահ Ռոզա Ծառուկյանի հետ համատեղ այցելություններ են կատարվելու բոլոր մարզեր`  տեղի մեղվաբույծների հետ առկա խնդիրները քննարկելու, առաջարկությունները լսելու, մեղվաբուծության զարգացման ծրագրեր կազմելու եւ կառավարութան քննարկմանը ներկայացնելու նպատակով: Խորհրդակցության ավարտին նախարարը լսել  եւ պատասխանել է մեղվաբույծների կողմից բարձրացված հարցերին: