Մեզ համար առավել կարևոր է մեր աշակերտների առողջությունը. Աշոտյանը` Բաքու գնալու մասին

Տեղեկացրել էինք, որ ՀՀ ԿԳ նախարար Արմեն Աշոտյանը մեր աշակերտների հետ կմեկնի Բաքու` «Քիմիա» առարկայի միջազգային օլիմպիադային մասնակցելու: Լրագրողների հետ հանդիպման ժամանակ Աշոտյանը նշեց, որ կարևորում է մեր աշակերտների ուսումնական առաջընթացը, բայց բոլորիս համար էլ առավել կարևոր է նրանց առողջությունը:

«Դիմել ենք Ադրբեջանին` անվտանգության համապատասխան երաշխիքներն ապահովելու համար, և եթե նրանք խոստանան ապահովել մեր երեխաների անվտանգությունը` մենք կմասնակցենք օլիմպիադային, եթե` ոչ, բնականաբար, չենք գնա: Սակայն չգնալու դեպքում հարցը կբարձրացնենք միջազգային ատյաններում, քանզի նման խտրական վերաբերմունք չի կարելի»,- ասաց նախարարը` հավելելով, որ այժմ սպասում են ադրբեջանական կողմի արձագանքին:

Նշենք, որ մասնակցության հրավեր Հայաստանը ստացել էր Քիմիայի 47-րդ միջազգային օլիմպիադայի կազմկոմիտեի նախագահ Նարգիզ Փաշաևայից: