Վրաստանի վարչապետը պարզաբանումներ է պահանջել Հովիկ Աբրահամյանից

Այսօր Վրաստանի վարչապետ Իրակլի Ղարիբաշվիլին հեռախոսազրույց է ունեցել իր հայ գործընկեր Հովիկ Աբրահամյանի հետ: Այս մասին տեղեկացնում ենք Վրաստանի վարչապետի պաշտոնական կայքից:

Հեռախոսազրույցի ընթացքում նրանք խոսել են Հարավային Օսիայի խորհրդարանի նախագահ Անատոլի Բիբիլովի և Հայաստանի խորհրդարանի խոսնակ Գալուստ Սահակյանի հանդիպման մասին:

Ըստ Վրաստանի վարչապետի պաշտոնական կայքի` Հայաստանի վարչապետն ասել է, որ Անատոլի Բիբիլովը շաբաթվա վերջին մասնավոր այց է կատարել ԼՂՀ, նաև ոչ պաշտոնական` անձնական բնույթի հաղորդակցություն է ունեցել Գալուստ Սահակյանի հետ: Հանդիպման ընթացքում գործարար բնույթի, նաև վրացական օկուպացված տարածքների մասին քննարկումներ չեն եղել:

Ըստ կայքի` Հովիկ Աբրահամյանը վերահաստատել է աջակցությունը Վրաստանի տարածքային ամբողջականությանը եւ ընդգծել Հայաստանի բարեկամական եւ բարիդրացիական հարաբերությունները Վրաստանի հետ: