Հայոց ցեղասպանությունը եվրոպական պատմության ամենասև էջերից մեկն է. ԵԺԿ նախագահ

Երեկ Ծիծեռնակաբերդի հուշահամալիր է այցելել նաև Եվրոպական ժողովրդական կուսակցության (ԵԺԿ) նախագահ Ժոզեֆ Դոլը:

Հայաստան ժամանած չորս երկրների նախագահների հետ հարգանքի տուրք մատուցելով Ցեղասպանության անմեղ զոհերի հիշատակին` Դոլը գրառում է կատարել Ցեղասպանության թանգարան-ինստիտուտի հուշամատյանում:

Երեկվա այցի մասին ԵԺԿ նախագահը իր ֆեյսբուքյան էջում գրել է. «Այսօր մենք նշում ենք Հայոց ցեղասպանության 100-րդ տարելիցը` եվրոպական պատմության ամենասեւ էջերից մեկը: Մասնակցում եմ մեծ հուզմունքով` այստեղ` Երեւանում, հարգանքի տուրք մատուցելով այդ չարագործության 1,5 մլն անմեղ զոհերի հիշատակին: Կցանկանայի իմ, նաեւ ԵԺԿ-ի համերաշխությունը հայտնել հայ ժողովրդին, քանի որ նրա անսահման տառապանքը արթնացնում է խիղճը եւ մեզ հիշեցնում, որ մարդկությունը արժեքավոր է ու փխրուն եւ ամեն պահի պաշտպանության կարիք ունի»:

ԵԺԿ նախագահը հղում է կատարել մարտի 3-ին ԵԺԿ-ի կողմից ընդունված` Հայոց ցեղասպանության վերաբերյալ բանաձևին: