ՌԴ գլխավոր դատախազությունը խուսափում է խոսել Կոստանյանի նամակի մասին

Փետրվարին Yerkir.am-ը հարցում էր ուղարկել ՌԴ գլխավոր դատախազություն՝ պարզելու, թե ինչո՞ւ է ուշանում ՀՀ գլխավոր դատախազ Գևորգ Կոստանյանի՝ ՌԴ գլխավոր դատախազին ուղղված նամակի պատասխանը:

Հիշեցնենք, որ փետրվարի 3-ին Կոստանյանը դիմել էր իր ռուս գործընկեր Յուրի Չայկային՝ Գյումրիի սպանդի մեջ մեղադրվող Վալերի Պերմյակովին հայկական կողմին հանձնելու խնդրանքով:

Այսօր նամակով ստացանք ՌԴ գլխավոր դատախազության պատասխանը: «ԶԼՄ-ների հետ համագործակցության բաժինը դիտարկել է ձեր ՝ Վալերի Պերմյակովի մասին տեղեկություն տրամադրելու մասին հարցումը: Հայտնում ենք, որ ներկայումս տվյալ անձի դեմ հարուցված քրեական գործն ավարտված չէ: Տեղեկացնում ենք, որ ՌԴ և ՀՀ իրավապահ մարմինների համագործակցությունը տվյալ գործով կազմակերպվել է հանցավորության դեմ պայքարի ոլորտում միջազգային համաձայնագրերին համապատասխան, որոնց մասնակիցն են ՌԴ-ն և ՀՀ-ն»,- ասվում է նամակում: