Երբ Yeezus-ը փորձել է քայլել ջրի վրա… միջազգային մամուլի արձագանքը Քանյեի երևանյան համերգին

Միջազգային մամուլում մեծ արձագանք է գտել Քանյե Ուեսթի՝ Կարապի լճում տեղի ունեցած խելահեղ համերգը:

Dailymail, The New York Times, Reuters, CNN, MTV, և այլ հեղինակավոր կայքեր Քանյեի՝ ջուրը նետվելու քայլը «խելահեղ» են անվանել:

«Այն պահը, երբ Yeezus-ը (Քանյեի 6-րդ ալբոմի անվանումը) փորձել է քայլել ջրի վրա»,- գրել է Dailymail-ը՝ նշելով, որ Քանյեի խելահեղ քայլից հետո ազգային անվտանգությունը դադարեցրել է համերգը:

«Համերգն ընդամենը տևել է րոպեներ, սակայն Քանյեն, անկասկած, Հայաստանին տվել է հիշելու բան»,- գրել է թերթը:

Sky-ը ևս անդրադարձել է Քանյեի համերգին` նկարագրելով նրա քայլի մանրամասները:

«Ջրի մեջ ցատկելուց առաջ Ուեսթը, որի վերջին ալբոմը կոչվում է «Yeezus», գոռաց. «Այնտեղ, դուք կարողանո՞ւմ եք ինձ տեսնել: Մենք հիմա կանենք մի շատ ուրիշ բան, ինչպես, ինչպես, ինչպես միշտ, մենք այս անգամ էլ կանենք»,- կայքը հիշեցնում է Քանյեի խոսքերը ջուրը ցատկելուց առաջ: