Քիմը եւ մենք

Ըստ շրջանառվող տեղեկությունների` վաղը ամերիկահայ մոդել Քիմ Քարդաշյանը կգա Հայաստան: Արդեն Երեւանում են նրա թիմի ներկայացուցիչները, ասում են՝ վարձակալվել է քաղաքի հյուրանոցներից մեկի միանգամից երկու հարկը: Սենյակներից մեկն էլ, հավանաբար, վարձակալվել է Քիմի` բացառապես հագուստի համար: Ո՞վ չգիտի, որ Քիմը նաեւ հագնվում է:

Սա այդքան էլ կարեւոր չէ: Համենայն դեպս, այնքան կարեւոր չէ, որ ամբողջ ազգով քննարկենք: Ազգովի քննարկման այլ բան կա, այն, թե ի՞նչ է ասում Քիմը: Իսկ նա ասում է` Հայոց ցեղասպանություն: Մենք, իհարկե, նրան իրավունք չենք տվել, որ այդքան նուրբ թեմայի մասին խոսի` հաշվի առնելով Քիմի, այսպես կոչված, «բարոյական կասկածելի նկարագիրը», իբր Հայաստանի ներսում եւ դրսում, ով այդ թեմայի մասին խոսում է, բարոյականության հետ խնդիրներ չունի:

Բայց Քիմը մեր տված իրավունքին չի նայում եւ Փառք Աստծո: Նա ամբողջ աշխարհում սփռված միլիոնավոր երկրպագուներ ունի, կան բազմաթիվ աղջիկներ, ովքեր Քիմի պես են հագնվում, հարդարվում, շպարվում, քայլում… Քիմը նրանց համար հեղինակություն է եւ ոչ միայն նրանց համար:

Ինքը` Բրիտանիայի վարչապետ Դեւիդ Քեմերոնը, բրիտանական խորհրդարանի ընտրություններից առաջ հայտարարեց, որ Քիմի հորեղբորորդին է` 13-րդ պորտով: Քեմերոնը հո սա պատահական չասա՞ց, իսկ ասաց, որովհետեւ վստահ է, եթե ինքը հայտարարի, որ Քիմի ազգականն է, ապա լրացուցիչ ձայներ կստանա:

Բայց մենք, չափից դուրս բարոյական լինելով, այս ամենը չենք կարեւորում: Հայեցի չէ, ապազգային է:

Հովիկ Աֆյան