Հեռուստատեսության թվայնացումը կհետաձգվի

Այսօր կառավարության նիստից հետո լրագրողների հետ զրույցում ՀՀ կապի և տրանսպորտի նախարար Գագիկ Բեգլարյանն անդրադարձել է հեռուստատեսության թվայնացման խնդրին: Նա նշել է, որ ներկայումս աշխատում են հեռուստատեսության և ռադիոյի մասին օրենքի նախագծի փոփոխությունների վրա, և որ առաջարկել են թվայնացման նախագծի հեղինակ ԱԺ պատգամավոր Էդմոն Մարուքյանին աշխատել նախարարության հետ:

Նախարարը նշեց, որ թվայնացման գործընթացը շատ հաջող է ընթանում , որ այսօր 60-70 տոկոս թվայնացումն իրականացվել է: Այն հարցին, թե թվայնացման գործընթացի հետաձգման ի՞նչ ժամկետների մասին է խոսքը` մեկ՞ թե երկու տարվա մասին, նախարարը նշեց, որ հետաձգման ժամկետների հարցը քննարկվում է:

«Վերջնական քննարկումից հետո մենք ձեզ կասենք` դա երկու տարի կլինի, վեց ամիս թե մեկ տարի»: Նա նաև նշեց, որ արբանյակի ուղեծրում Հայաստանը ունի իր կետը` 47 և 1, որտեղ պետք է գրանցվի, իսկ գրանցվելու համար Հայաստանի հետ պետք է համաձայնության գան արբանյակ ունեցող բոլոր երկրները: