Իմ նպատակը Հայաստանի հավաքականում հանդես գալն է. Արամ Լոռեցյան

Արդեն հայտնել ենք, որ ֆուտբոլի Հայաստանի գավաթի խաղարկության քառորդ եզրափակիչի առաջին խաղում «Միկա»-ն սեփական հարկի տակ պարտվել է «Բանանց»-ին: Հանդիպման ավելացված ժամանակի վերջին րոպեին հյուրերին  հաղթանակ է պարգևել թիմի կիսապաշտպան Արամ Լոռեցյանը, ով մրցակցի դարպասը գրավել է անկյունային հարվածով: «Բանանց» ակումբի պաշտոնական կայքը հարցազրույց է ունեցել 22-ամյա ֆուտբոլիստի հետ:

 - Երբ անկյունայինից ցանկանում էի փոխանցում կատարել չէի մտածում գոլ խփելու մասին: Իսկ երբ գնդակը սկսեց ընթանալ ու հասկացա, որ շեղում է ուղղությունը, արդեն գոլի հույսեր ունեցա: Անկյունայինից առաջին անգամ չէ, որ գոլ եմ խփում, դեպքեր պատահել են. հիշում եմ՝  Հայաստանի առաջին խմբի առաջնությունում:

- Հանդիպմանը նախ հետևում էիր պահեստայինների նստարանից, ապա` արդեն խաղադաշտում: Ինչպե՞ս կբնութագրես «Բանանց»-ի խաղը:

- Երբ պահեստայինների նստարանին էի, զգում էի, թե խաղադաշտում ինչպիսի դժվարին և ծանր պայքար է ընթանում: Բայց կարծում եմ` «Բանանց»-ը, այնուամենայնիվ, փոքր-ինչ առավելություն ուներ: Խաղադաշտում լիովին այլ զգացողություններ են, այդ ուժեղ պայքարին միացնում ես քո ամբողջ ուժը, և ձգտումը հաղթանակի հասնելն է:

- Պատասխանը խաղը լինելու է սեփական հարկի տակ: Այս հաղթանակը ի՞նչ տվեց թիմին:

- Պատասխան խաղին, կարծում եմ, ավելի ենք տրամադրվելու հաղթանակի: Իհարկե, «Միկա»-ն  էլ է ցանկանում հաղթել, բայց… Մենք թիմով ամեն ինչ անելու ենք, որպեսզի հասնենք եզրափակիչ: Իսկ այս հաղթանակը մեծ առավելություն էր մեզ համար:

- Ո՞րն է այս տարվա քո գլխավոր նպատակը:

 - Իմ նպատակը Հայաստանի հավաքականում հանդես գալն է, յուրաքանչյուր օրվա մարզում, յուրաքանչյուր խաղ միտված է դրան` կրել ազգային հավաքականի մարզաշապիկը: