Հեպատիտ C-ով վարակի դեպքի հիմնական մեղավորների ցուցակը պատրաստ է. հիվանդանոցի նախկին տնօրենը հարցաքննվել է

Yerkir.am-ի տեղեկություններով` ավարտվել են առողջապահության նախարարության կողմից Քաջարանի հիվանդանոցում հեպատիտ C վարակի դեպքի առթիվ ձևավորված խմբի ուսումնասիրությունները, և նախարարությունն արդեն իսկ իրավապահներին է հանձնել հանձնաժողովի կողմից իրականացված մասնագիտական ուսումնասիությունների արդյունքների վերաբերյալ արված եզրակացությունը:

Մեր տեղեկությունների համաձայն`  եզրակացության մեջ նշված է, որ վարակի տարածման աղբյուրը եղել է ներհիվանդանոցային հիգիենայի նորմերը չպահպանելը, իսկ դրա մեղավորների ցուցակում նախարարությունն ընդգրկել է  4 հավանական մեղավորների:

Իրավապահները դեռևս քննարկում են վարակի տարածման պատճառների հիմնական վարկածները: Հավանաբար, շուտով կավարտվի գործի նախաքննությունը:

Հիշեցնենք, որ անցած տարեվերջին Քաջարանի բժկական կենտրոն առողջանալու նպատակով ընդունված տասնյակից ավելի քաղաքացիներ այնտեղից դուրս եկան սուր հեպատիտով: Սյունիքի մարզպետարանի ենթակայության տակ գործող բուժհիմնարկի արդեն նախկին տնօրեն Վարդան Ավագյանը, որ արդեն հինգ ամիս է, ինչ անհասանելի է թե'  լրագրողների և թե'  քաղաքացիների համար, մեր տեղեկություններով, գտնվում է Հայաստանում և գործի շրջանակներում արդեն իսկ կանչվել է հարցաքննության:

Պաշտոնական հայտարարության համաձայն` դեպքը տեղի էր ունեցել ստերիլիզացման կանոնները խախտելու հետևանքով, վարակազերծված չեն եղել մի քանի բժշկական գործիքներ, և սա վերանորոգված և տեխնիկապես զինված հիվանդանոցում:

Ի դեպ, ներհիվանդանոցային հիգիենան չպահպանելու համար նախարարությունն առ այսօր նկատողություն և կարգապահական տույժ չի կիրառել որևէ բուժաշխատողի նկատմամբ: Ասում են, թե սպասում են հարուցված քրեական գործի ավարտին: