Կքայլի՞ տղան, թե՞ ոչ` դժվար է ասել. հակառակորդի գնդակից վիրավորված զինծառայողը դեռ հիվանդանոցում է

Տեղեկացրել էինք, որ հունվարի 23-ի առավոտյան Տավուշի մարզի Բերդի շրջանում հակառակորդի հարձակման ժամանակ վիրավորվել էր շարքային Հովհաննես Ավանեսյանը: Վնասվել էին զինծառայողի թոքն ու լյարդը: Նրան Բերդում վիրահատելուց հետո տեղափոխել էին Կենտրոնական կլինիկական զինվորական հոսպիտալ: Տղայի վիճակի` փոքր-ինչ կայունացումից հետո վիրահատել էին նաև ողնաշարը, այնուհետև` կրկին լյարդը:

Yerkir.am-ի հետ զրույցում հոսպիտալի բուժծառայության պետ Արտաշես Խաչատրյանը հայտնեց, որ տղայի վիճակն արդեն լավ է, իրեն լավ է զգում:

«Ստացիոնար բուժում է ստանում, մի քիչ էլ լավանա` կտեղափոխենք վերականգնողական կենտրոն` Կարմիր խաչ կամ այլ տեղ: Թոքն ու լյարդը նորմալ աշխատում են արդեն, միակ խնդիրը հենաշարժողականն է` տղան գոտկատեղից ներքև չի զգում, քանի որ ողնուղեղի վնասվածք էր ստացել: Ճիշտ է, մենք վիրահատել ենք ողնաշարը, բայց ողնուղեղը վերականգնելը տարիներ է տևում»,- նշեց բժիշկը:

Կքայլի՞ արդյոք տղան, թե՞ ոչ` դժվար է ասել: Ըստ Խաչատրյանի` տղան հաշմանդամություն ձեռք կբերի, բայց թե որ աստիճանի, չեն կարող ասել: