Ցեղասպանության մասին ֆիլմեր կցուցադրվեն աշխարհի մի շարք երկրներում

2015-ին ՀՀ մշակույթի նախարարությունը նախատեսում է իրականացնել մի շարք միջոցառումներ` Ցեղասպանության 100-րդ տարելիցի հետ կապված: Այսօր տարեվերջյան ամփոփիչ ասուլիսի ժամանակ ՀՀ մշակույթի նախարար Հասմիկ Պողոսյանն ասաց, որ Ցեղասպանության կապակցությամբ մենք մեծ ասելիք ունենք, որն առաջին հերթին պետք է ուղղված լինի հենց մեզ, հետո` արդեն աշխարհին:

«Մենք մեզ պետք է վերապատմենք, թե ինչ եղավ 100 տարի առաջ, և պետք է ճիշտ վերապատմենք, որ կարողանանք աշխարհին էլ այդկերպ այն մատուցել: Նախարարությունն ազգային արխիվի, պատմության թանգարանի, Ցեղասպանության թանգարան-ինստիտուտի հետ համատեղ նախաձեռնել է ցուցահանդես, որը նվիրված կլինի հետցեղասպանության պատմությանը և դրա վերլուծությանը: Ցուցահանդեսը կբացվի ապրիլ ամսին՝ պատմության թանգարանում»,-հայտնեց նախարարը:

Նա տեղեկացրեց նաև, որ 2015-ին «Ոսկե ծիրան» կինոփառատոնի շրջանակներում աշխարհի մի շարք երկրների կինոթատրոններում կցուցադրվեն Ցեղասպանության մասին պատմող ֆիլմեր: Ըստ նախարարի` Հայաստանի բոլոր երաժշտական կոլեկտիվները նույնպես արտերկրում հանդես կգան համերգներով: