Տաքսիների լիցենզավորման նոր ընթացակարգը

Մարտի 1-ից ուժի մեջ է մտել տաքսիների լիցենզավորման նոր ընթացակարգը: Համաձայն արդեն ուժի մեջ մտած նոր լիցենզավորան ընթացակարգի` անհատ տաքսիստները պետք է անպայման տեղադրեն հաշվիչներ, ունենան մեքենայում գազի բալոն տեղադրելու թույլտվություն: Զուգահեռաբար, վերացվել են պարտադիր բուժզննման և տեխզննման պահանջները:

Նոր օրենքով անհատ տաքսիստների ամսական 14.500 դրամը նվազեցվել է` դառնալով 12.000 դրամ` Երևանի համար: Հանրապետության մյուս քաղաքներ համար հարկը կազմում է ամսական 8000 դրամ, իսկ գյուղական համայնքների անհատ տաքսիստները պետք է վճարեն 5000 դրամ` ամսական:

Անհատ տաքսիստների համար վերացել է նաև տարեկան 25.000 դրամ պետական տուրքի պահանջը: Իսկ տաքսի ծառայությունների համար`  մինչև 4 մեքենայի համար տարեկան պետական տուրքը կազմում է 100.000 դրամ` նախկին 200.000 դրամի փոխարեն: