Քրեածին իրավիճակ` Տավուշի մարզի Աչաջուր գյուղում

Այս օրերին լարված իրավիճակ է տիրում Տավուշի մարզի Աչաջուր գյուղում: Yerkir.am-ի տեղեկություններով` նախորդ գիշեր, ՀՀ քննչական կոմիտեի ՀԿԳ քննության գլխավոր վարչության հանձնարարությամբ, մի շարք քաղաքացիների տներում խուզարկություններ են կատարվել,  և տասնյակ քաղաքացիների, հարցաքննելու նպատակով, բերման են ենթարկել բաժին:

Որոշ տեղեկությունների համաձայն` խուզարկություն է կատարվել նաև գյուղի նախկին ղեկավարներից Տաթև Գասպարյանի տանը:

Բանն այն է, որ դեռևս երկու տարի առաջ Աչաջուրի նախկին գյուղապետ Պավլիկ Ղալթախչյանի եղբոր` Կամոյի դեմ կատարված մահափորձի և 2014-ի փետրվարին նրա դեմ ծրագրված, սակայն ավարտին չհասցված մահափորձի վերաբերյալ նոր հանգամանքներ են ի հայտ եկել:

Նշենք, որ Կամո Ղալթախչյանը ՀՀԿ-ական է և 2013-ի նոյեմբերից զբաղեցնում է Աչաջուրի գյուղապետի պաշտոնը, իսկ նրա որդին դատապարտված է համագյուղացու սպանության գործով:

Աչաջուրի բնակիչ Մեխակ Մելիքբեկյանը, ով մեղադրվում է գյուղապետի նկատմամբ իրականացված նոր մահափորձի մեջ, հայտարարությամբ է հանդես եկել և հայտնել, որ իրեն առևանգել են և պարտադրել ստանձնել գյուղապետի նկատմամբ սպանության փորձ կատարելու մեղադրանքը:

Yerkir.am-ին  ՀՀ քննչական կոմիտեի ղեկավարի մամլո խոսնակ Սոնա Տռուզյանը հայտնեց, որ ՀՀ քննչական կոմիտեի հատկապես կարեւոր գործերով քննության գլխավոր վարչության վարույթում քննվում է 2 քրեական գործ` գյուղապետի նկատմամբ սպանության փորձ կատարելու և անձի առևանգման դեպքերի առթիվ:

Նա նշեց, որ այս օրերին երկու քրեական գործերի շրջանակներում քննչական գործողություններ են կատարվում, այդ թվում` հարցաքննություններ և խուզարկություններ: Քրեական գործի շրջանակներում հանձնարարություններ են տրվել ոստիկանության համապատասխան ստորաբաժանումներին`  ձեռնարկել օպերատիվ-որոնողական աշխատանքներ` հնարավոր վկաներին հայտնաբերելու և քննությանը ներկայացնելու համար:

Աչաջուրում տեղի ունեցող իրադարձությունների մասին կտեղեկացնենք առաջիկայում: