Փոքրիկ Սերյոժան տեղափոխման ենթակա չէ

Տեղեկացրել էինք, որ Գյումրու սպանդից փրկված փոքրիկի առողջական վիճակը սկսել է վատանալ:

«Սուրբ Աստվածամայր» բժշկական կենտրոնի տնօրեն Նիկոլայ Դալլաքյանը լրագրողների հետ զրույցում հայտնեց, որ երեխայի մոտ օրեցօր նոր խնդիրներ են ծագում: «Նույնիսկ երեխայի տեղափոխումը Գյումրիից մեզ մոտ եղել է պրոբլեմատիկ, և ճանապարհին կարող էինք կորցնել նրան: Երեխան այս վայրկյանին տեղափոխման ենթակա չէ, նույնիսկ առաջին հարկ իջեցնել չենք կարող` նրան ապարատից անջատելը կարող է ճակատագրական լինել: Տա Աստված` կարողանանք երեխային հանել այս կրիտիկական վիճակից, ստաբիլիզացնել սիրտ-անոթային համակարգի աշխատանքը, թոքային անբավարարությունը և, բնականաբար, երիկամների աշխատանքը կայունացնել»,- ասաց նա:

Դալլաքյանը նշեց, որ այս պահին երեխան լրջագույն խնդիրներ ունի բոլոր օրգան-համակարգների հետ, և նմանատիպ իրավիճակում ճիշտ չէ կանխատեսումներ անել, թե ինչպիսին կլինի երեխայի վիճակը հետագայում: «Մեր պայքարը եղել է ծագող տարբեր բարդությունների դեմ պայքարելն ու երեխայի վիճակը կայունացնելը»,- ասաց նա:

Հիշեցնենք, որ ՌԴ նախագահ Վլադիմիր Պուտինը պատրաստակամություն էր հայտնել օդանավ ուղարկել և Սերյոժային հետագա բուժման նպատակով տեղափոխել Ռուսաստան: