Պատգամավորի վրա հարձակվողը միջին տարիքի տղամարդ է եղել, ոչինչ չի ասել, հարվածել է

ՀԱԿ մամլո խոսնակ Արման Մուսինյանը լրագրողների հետ զրույցում մանրամասներ է ներկայացրել Արամ Մանուկյանի հետ պատահածից՝ նշելով, որ դեպքը տեղի է ունեցել այսօր, երբ Արամ Մանուկյանը դուրս է եկել իր բնակարանից եւ իջել շենքի առաջին հարկ: Այս մասին տեղեկացնում է ԳԱԼԱ-ն:

Հարձակվողը միջին տարիքի տղամարդ է եղել: Նա ոչինչ չի ասել, հարվածներ է հասցրել պատգամավորին դեմքի շրջանում եւ դիմել փախուստի: Արման Մուսինյանն ասել է նաեւ, որ շենքում տեղադրված են տեսախցիկներ, որոնք, հավանաբար, ֆիքսել են տեղի ունեցածը:

ԳԱԼԱ-ի լրագրողի այն հարցին, թե ինչո՞վ են ՀԱԿ-ում պայմանավորում պատգամավորի վրա հարձակումը, Ա. Մուսինյանը պատասխանել է` Արամ Մանուկյանի քաղաքական գործունեությամբ: «Արամ Մանուկյանը քաղաքական գործիչ է, եւ կապում ենք նրա քաղաքական գործունեության հետ, քանի որ մենք ապրում ենք հանցագործ երկրում»,- ասել է նա: