Արցախի Ճարտար համայնքը քաղաքի կարգավիճակ ստացավ

«Արցախպրես»-ը հաղորդում է, որ այսօր տեղի ունեցած` ԼՂՀ Ազգային ժողովի լիագումար նիստում հավանություն է տրվել կառավարության առաջարկին` Մարտունու շրջանի Ճարտար համայնքին տալ քաղաքի կարգավիճակ:

Օրենքն ընդունվել է ձայների` 19 կողմ, 5 դեմ, 3 ձեռնպահ հարաբերակցությամբ։

Հիշեցնենք, որ հուլիսին, տեղական հանրաքվե անցկացնելով, Ճարտար եւ Ղուզե Ճարտար համայնքների բնակչությունը քվեարկել էր երկու համայնքների միավորման օգտին: Ելնելով դրանից՝ կառավարությունը փոփոխություններ եւ լրացումներ է առաջարկել «ԼՂՀ վարչատարածքային բաժանման մասին» օրենքում:  Համաձայն դրանց`  առաջարկվում է Ճարտարի տարածքում գտնվող Զորավանին ևս տալ քաղաքի կարգավիճակ՝ Ներքին ճարտար անունով՝ ընդգրկելով այն Ճարտար քաղաքային համայնքի կազմում:

Նշենք նաև, որ Ճարտարը Արցախի ամենամեծ գյուղական համայնքն էր: