Սամբոյի աշխարհի չեմպիոն Մավրիկ Նասիբյանը հաղթանակը նվիրել է զոհված հայ օդաչուների հիշատակին

Նոյեմբերի 25-ին` ժամը 01:30-ին, «Զվարթնոց» օդակայանում վայրէջք կատարեց Մոսկվա-Երևան չվերթի օդանավը, որով հայրենիք էին վերադառնում Ճապոնիայում անցկացված` սամբոյի աշխարհի առաջնությանը մասնակցած Հայաստանի սամբոյի հավաքականի անդամները:

Մարզաձևի բազմաթիվ երկրպագուներ էին հավաքվել` դիմավորելու հատկապես աշխարհի չեմպիոն Մավրիկ Նասիբյանին, ով ուժեղագույնն էր մարտական սամբոյի 74 կգ քաշային կարգում:

sambo.am-ին տված կարճ հարցազրույցում Մավրիկ Նասիբյանը հայտարարել է, որ իր հաղթանակը նվիրում է Արցախի երկնքում նահատակված հայ օդաչուներին:

Հիշեցնենք, որ և' նորընծա չեմպիոնը, և' բրոնզե մեդալի արժանացած Աշոտ Դանիելյանը արցախցի են ու ներկայացնում են սամբոյի և ձյուդոյի օլիմպիական մանկապատանեկան մարզադպրոցի` Ստեփանակերտի մասնաճյուղը:

Հիշեցնենք, որ սամբոյի աշխարհի առաջնությունը տեղի էր ունեցել նոյեմբերի 21-23-ը Ճապոնիայի Նարիտա քաղաքում՝ 80 երկրի շուրջ 600 մարզիկի մասնակցությամբ: