Հոկտեմբերի 10-ին ասելու ենք՝ «դավայ, դասվիդանիա». Արամ Մանուկյան

Արարատում մեկնարկած իրազեկման հանրահավաքի ժամանակ ԱԺ ՀԱԿ խմբակցության քարտուղար Արամ Մանուկյանն անդրադարձավ «Շրջանառության հարկի մասին» օրենքի նախագծին, որը մեծ դժգոհություն է բարձրացրել: Նա նշեց կառավարության այն կոմպրոմիսային տարբերակը, որը ներկայացրել են իրենց` «անհարկի ստուգումներից ձեռնպահ մնալու» հավաստիացում:

«Թղթերը մեծից ուզեք: Ինչի՞ ես գնում կպնում դազգահի մոտ աշխատողի ջանին, որ ինքը կլյաուզնիկի նման թուղթ տա: Մեծի քեֆին կա'մ չեն կարողնում կպնել, կա'մ չեն ուզում»,- հայտարարեց Մանուկյանը եւ ընդգծեց, որ կառավարության նման գործելաոճի դեպքում փակվելու են փոքր ձեռնարկությունները: Գործազրկությանը, ըստ նրա, կհետեւի արտագաղթը:

«Իրենց հետաքրքրում է բյուջեի կատարողականը: Չեն ուզում հեղափոխություն, չեն ուզում, որ դուք Հայաստանում ապրեք: Ուզում են ուտել, ուտել մինչեւ վերջ եւ չկշտանալ: Չկշտանալը դա ամենամեծ պատիժն է: Բոմժի քաղցը, ուղտի ծարավը... Էս իշխանությունը սահման չունի, կլպելու են մինչեւ վերջ»,- ասաց Արամ Մանուկյանը: Նա թվարկեց, թե ինչեր են թանկացել Սերժ Սարգսյանի իշխանության ժամանակ:

Իսկ վերջում ասաց. «Հոկտեմբերի 10-ին գնալու ենք, ասենք՝ «դավայ, դասվիդանիա»»: