Էրդողանի կինն օգտագործում է Միշել Օբամայի ստորագրությունը (լուսանկար)

Էրդողանի կնոջ՝ Էմինե Էրդողանի Twitter-յան էջում այնպիսի վրիպակ է տեղ գտել, որը վայրկյանների ընթացքում տարածվել է համացանցում և դարձել քննադատության լուրջ առարկա:

Ըստ Haberler-ի՝ ԱՄՆ նախագահ Բարաք Օբամայի կնոջ՝ Միշել Օբամայի Twitter-յան էջը ղեկավարվում է իրավասու անձանց կողմից, ինչի մասին տեղեկացվում է. «Սույն հաշիվը ղեկավարվում է իրավասու անձանց կողմից: Էջում տեղ գտած գրառումները պատկանում են առաջին տիկնոջը` ՄՕ»: ՄՕ-ն Միշել Օբամայի անվան և ազգանվան առաջին տառերն են, այդ հապավումը համացանցում նա օգտագործում է որպես ստորագրություն:

Էրդողանի կինը՝ Էմինե Էրդողանը, ևս Twitter-յան հաշիվ է բացել և հետևել Միշել Օբամայի օրինակին: Էմինե Էրդողանի էջի ղեկավարները, գուցե չնկատելով ՄՕ ստորագրությունը կամ չհասկանալով դրա իմաստը, նույն գրությունը տեղադրել են նրա էջում: Այսինքն՝ Էմինե Էրդողան` ԷԷ-ի փոխարեն՝ ՄՕ:

Թուրքակական կայքերը նշում են, որ դեռևս պարզ չէ՝ էջն իսկապե՞ս Էմինե Էրդողանինն է, թե՞ ոչ: