Ֆինանսների նախկին նախարար Դավիթ Սարգսյանը ցուցմունք կտա դատարանում

Իտալահայ բիզնեսմեն և կառավարության իրավաբանական վարչության պետ ներկայանալով` առանձնապես խոշոր չափերի գումարներ հափշտակելու համար մեղադրվող` 35-ամյա Արթուր Սարգսյանի գործով դատավարությունը մոտենում է կուլմինացիոն պահին:

Այսօր դատարանը, դատավոր Արշակ Վարդանյանի նախագահությամբ, բավարարեց տուժողի ներկայացուցիչ, փաստաբան Լիանա Գրիգորյանի միջնորդությունը  ֆինանսների նախկին նախարար Դավիթ Սարգսյանին դատակոչելու վերաբերյալ: Լ. Գրիգորյանը հայտնեց, որ բոլոր տուժողներն անխտիր իրենց ցուցմունքներում տվել են այդ մարդու անունը, և համաձայն այդ ցուցմունքների` հենց նա պետք է որոշակի գործողություններ աներ` իրենց կողմից տրված գումարների դիմաց:

Փաստաբանի այս միջնորդությանը միահամուռ կերպով միացան բոլոր տուժողներն ու նրանց ներկայացուցիչները: Ավելին` միջնորդության դեմ չառարկեց և նույնիսկ կողմ արտահայտվեց ամբաստանյալի փաստաբան Հունան Բաբայանը:

Դավիթ Սարգսյանին դատարան կանչելու և հարցաքննելու դեմ առարկեց միայն մեղադրող դատախազը: Նա իր առարկությունը հիմնավորեց նրանով, որ նախաքննական մարմինը նրան հարցաքննելու ընթացքում եկել է այն եզրահանգման, որ մեղադրանքի հետ նա առնչություն չունի:

Yerkir.am-ի հարցին, թե ինչո՞վ է բացատրվում այն հանգամանքը, որ Դավիթ Սարգսյանին դատակոչելու միջնորդությանը առարկեց միայն դատախազը,  փաստաբան Լիանա Գրիգորյանը պատասխանեց.  «Ճիշտն ասած,  ինձ համար էլ մի փոքր անհասկանալի էր մեղադրողի դիրքորոշումը: Ես համոզված էի, որ նա էլ չի առարկի` հաշվի առնելով այն հանգամանքը, որ միջնորդությանը միացավ նաև պաշտպանական կողմը»:

Իսկ մեր այն դիտարկմանը, թե միգուցե սա վկայում է այն մասին, որ պետությունը շարունակում է իր թևի տակ պահել Դավիթ Սարգսյանին, փաստաբանն ասաց. «Ընդամենը կարող ենք ենթադրել, սակայն Դ. Սարգսյանի հարցաքննությունից հետո պատկերը շատ ավելի կպարզվի թե'  մեղադրող կողմի, թե' պաշտպանական կողմի համար, նաև` դատավճիռը կայացնելիս էական հանգամանք կարող է հանդիսանալ»: