Տաքսու վարորդին ազատ արձակելու համար 4000 դոլար են պահանջում

Երևանի բնակչուհի Արաքսյա Թորոյանը, ով իր 4-ամյա դստեր հետ բնակվում է վարձով, վեց ամիս է, ինչ ստում է երեխային` ասելով, որ հայրը գտնվում է ՌԴ-ում: Սակայն իրականում ամուսինը` 25-ամյա Գևորգ Գևորգյանը,  կես տարի է` գտնվում է կալանքի տակ:

Արաքսյան մեզ հետ զրույցում պատմեց, որ ամուսինը մինչև կալանավորվելն աշխատել է որպես տաքսու վարորդ: «Փետրվար ամիսն էր, ամուսնուս զանգահարեց ընկերը` Միշա Ալիյանը, ով նույնպես տաքսու վարորդ է, և խնդրեց օգնել իրեն իրանցի երկու քաղաքացիների տեղափոխելու հարցում` պատճառաբանելով, որ ինքը նրանց լեզուն չի հասկանում»,- պատմեց կինը, այնուհետև մեջբերեց ամուսնու պատմածները, ըստ որի` Խանջյան փողոցում իրանցիներին իջեցնելուց հետո նրանք հրաժարվել են գումար տալ, և ինքը ստիպված 4000 դրամ խլել է ուղևորներից մեկից, այնուհետև նստել իր մեքենան:

«Հետո, ամուսնուս խոսքով, ինքը տեսել է, թե ինչպես է Միշա Ալիյանը պարսիկի վզին դանակ դրել և վերցրել դրամապանակը, որտեղ փաստաթղթեր են եղել, գումար»,- ասաց Արաքսյան և հավելեց, որ գողացված գումարի հետ իր ամուսինն առնչություն չունի, և որ անգամ առերեսման ժամանակ իրանցին ասել է, որ իրեն սպառնացողը Գևորգը չի եղել, այլ կակազող տղան, այսինքն` Միշան: Կինը նաև հայտնեց, որ քննիչներն իրեն հավատացրել են, որ Միշան հետախուզման մեջ է, սակայն, իր տեղեկություններով, նա պարբերաբար տեսնում է կնոջն ու երեխային:

Նա նաև նշեց, որ կալանավայրում ամուսնուն զանգահարել են ինչ-որ անձինք և խոստացել 4000 դոլարի դիմաց նրան ազատ արձակել: «Մեզ որտեղի՞ց այդքան գումար, որ վճարենք, կամ էլ ինչո՞ւ պետք է իմ ամուսինը պատասխան տա մի բանի համար, ինչը չի արել: Այո’, թող էլի դատեն, բայց միայն արածի համար»,- ասաց կինը:

Նշենք, որ Գևորգ Գևորգյանին մեղադրանք է առաջադրվել ՀՀ ՔՕ 175 -րդ մասի 2-րդ կետով: Ըստ մեղադրանքի` նա, Միշա Ալիյանի հետ նախնական համաձայնության գալով,  Նորք-Մարաշ վարչական շրջանի տարածքում սպառնալիքի գործադրմամբ, ավազակային հարձակմամբ ԻԻՀ քաղաքացիներ Ֆարզադ Ռաուֆիբորոուջենիից խոշոր չափի` 2000 ԱՄՆ դոլար, իսկ Այուբ Բահլաքեհից` 8.000 ՀՀ դրամ գումար է հափշտակել:

Մանրամասները` yerkir.am-ի տեսանյութում: