Տիգրանակերտում և Ազոխի քարանձավում նոր գտածոներ են հայտաբերվել

Տիգրանակերտում և Ազոխի քարանձավում շարունակվում են պեղումները: Լրագրողների հետ զրույցում ԼՂՀ մշակույթի նախարար Նարինե Աղաբալյանը տեղեկացրեց, որ և՛ Տիգրանակերտում, և՛ Ազոխում բազմաթիվ նոր գտածոներ են հայտաբերվել, որոնք ցուցադրվում են Ազոխի քարանձավին կից ցուցասրահում:

«Ազոխի քարանձավում պեղումներն իրականացնում է միջազգային գիտարշավը, որի կազմում ընդգրկված են հիմնականում անգլիացի, իսպանացի հնագետներ, իսկ Տիգրանակերտում մեր պատմաբաններն ու հնագետներն են աշխատում»,-ասաց նախարարը` հավելելով, որ ուսումնասիրությունների համար գումարները հատկացվում են պետական բյուջեից.«Տիգրանակերտի պեղումների համար գումարն ամբողջությամբ պետբյուջեն է տրամադրել, իսկ Ազոխի քարանձավի պեղումների համար հատկացումներ են կատարել թե՛ պետությունը, թե՛ տարբեր դոնորներ»:

Նշենք, որ պատմաբանները Տիգրանակերտը կոչում են այգիների մեջ թաղված սպիտակ քաղաք, որտեղ պեղումները սկսվել են 2004-ից: Այն իրականացվում է ՀՀ ԳԱԱ հնագիտության եւ ազգագրության ինստիտուտի Արցախի հնագիտական արշվախմբի ղեկավար, պատ. գիտ. դոկտոր, Երեւանի պետական համալսարանի Մշակութաբանության ամբիոնի վարիչ Համլետ Պետրոսյանի ղեկավարությամբ: