Եզդիներն ազատագրել են մի քանի բնակավայրեր, բայց վախենում են վերադառնալ իրենց տները

Իրաքում դեռ շարունակվում է եզդիների ցեղասպանությունը: Քրդերը չեն դադարում սպանել և տեղահանել եզդիներին.

«Այսօր ցեղասպանություն է տեղի ունենում, սա նման է Հայոց ցեղասպանությանը, երբ այդ կոտորածների նկարներ ես նայում, քեզ թվում է, թե Հայոց ցեղասպանության թանգարանում ես գտնվում»,-լրագրողների հետ հանդիպման ժամանակ ասաց «Մեդիա-Շանգալ» եզդդիների ազգային միավորում ՀԿ խորհրդի նախագահ Ամո Շարոյանը:

Բանախոսի հավաստմամբ եզդիները արդեն ազատագրել են մի քանի բնակավայրեր, բայց չեն կարողանում վերադառնալ իրենց տները, որովհետև վախենում են և երաշխիք չունեն, որ այնտեղ ապահով կլինի, իսկ երաշխիք կարող են տալ միայն միջազգային խաղաղապահ ուժերը:

«Այս վատ օրերին իմ սիրտը ուրախացնում է այն օգնությունը, որ մենք ստանում ենք: Իր օգնությունն է առաջարկել նաև ԼՂՀ-ն, հայտարարելով, որ կարող է ապաստան տալ փախստականներին»,-նշեց Ամո Շարոյանը:

Բանախոսը անդրադարձավ նաև Աշխարհի եզդիների միության նախագահ Ազիզ Թամոյանի հետևյալ հայտարարությունը, որտեղ նա ասել էր. «Թքեմ ես քրդերի կրոնի վրա, եթե դա է իրենց կրոնը և գնդակահարում են եզդի ժողովրդին»:

Ամո Շարոյանի կարծիքով ոչ ոք իրավունք չունի թքել, որևէ կրոնի վրա և համաձայն չէ Թամոյանի խոսքերի հետ: