Ուկրաինայում բանակն ու աշխարհազորայիններն իրար մեղադրում են հրադադարը խախտելու մեջ

Ուկրաինայի արևելքում հատուկ ռազմական գործողության ներկայացուցիչը հայտարարել է, որ աշխարհազորայինները շարունակում են գրոհել զինվորականների դիրքերի վրա` արհամարհելով նախագահ Պյոտր Պորոշենկոյի ներկայացրած, հակամարտությունը կարգավորող, խաղաղության ծրագիրը: Այս մասին հայտնում է РИА Новости-ն:

Իսկ ինքնահռչակ «Դոնեցկի Ժողովրդական Հանրապետությունում» իրենց հերթին Կիևին են մեղադրում կրակը դադարեցնելու խոստումը չպահելու մեջ:

Հիշեցնենք, որ հունիսի 20-ին Պորոշենկոն հատուկ գործողության մեջ ներգրավված բոլոր ուժային ստորաբաժանումներին հրամայել էր տեղական ժամանակով 22:00-ին դադարեցնել մարտական գործողությունները: Սա նախատեսված է Պորոշենկոյի ներկարացրած խաղաղության ծրագրով: Միաժամանակ նախագահը նշել էր, որ հարձակման դեպքում ուժայինները կանդրադարձնեն գրոհները: Հրադադարի ռեժիմն ուժի մեջ է մնալու մինչև հունիսի 27-ը: