Ժողովրդի համար ավելի լավ է, որ գործարարները շարունակեն մնալ ստվերում

Ֆինանսների փոխնախարար Արմեն Ալավերդյանի՝ լրագրողների հետ զրույցում հնչեցրած մի քանի մտքեր ուղղակի ապշեցուցիչ են: Պարզվում է՝ Հ. Աբրահամյանի նոր կառավարությունը բյուջեն լցնելու համար գնում է մի քայլի, որն անվանել այլ կերպ, քան կառավարության (հետևաբար՝ իշխանությունների) կոմպրոմիսը հանցագործների հետ, դժվար է:

Ըստ Ա. Ալավերդյանի՝ ֆինանսների նախարարությունը հստակ գիտի, թե ո՛ր ոլորտում ո՛ր խոշոր գործարարը ի՛նչ ստվերային շրջանառություն ունի, և իր այդ տեղեկատվությունն օգտագործում է ոչ թե այդ «խավարասերներին» օրենքով նախատեսված կարգով պատժելու, այլ նրանց սիրաշահելով-համոզելով «արևերես» բերելու, դրանով իսկ՝ բյուջեն լցնելու համար:

ՀՀ կառավարությունը Ա. Ալավերդյանի բերանով, փաստորեն, խոստովանում է սեփական անճարակությունը օրենքի դաշտում տնտեսական մրցակցության և գործունեության արդար պայմաններ ստեղծելու առումով, եթե անցել է անհնազանդ տնտեսվարողներին փաղաքշելով-չխրտնեցնելով «խելքի բերելու»` աբրահամյանական գործելակերպին: Եվ այս գործելակերպի ամբողջ զավեշտն այն է, որ կառավարությունն ինքն է, նախ, ստիպված «խելքի գալ», որը հուսալ, սակայն, ինչ խոսք, անհնար է: Ինչ վերաբերում է փոխնախարար Ա. Ալավերդյանին, ապա նա հազիվ թե չի գիտակցում, թե կոռուպցիոն առումով ինչ «հասցեներ» էր ինքը երեկ բարձրաձայնում:

Եթե ֆիննախն ու կառավարությունը գիտեն խոշոր հարկատուների բոլոր թույլ տեղերը, բայց նրանք անպատիժ շարունակում են իրենց ուզած ձևով գործարարությամբ զբաղվել, ուրեմն նաև կան մարդիկ, որոնց համար ևս ձեռնտու է նրանց այդօրինակ գործունեությունը, և այս դեպքում «ձեռնտու» բառը խիստ նյութական իմաստ է ստանում՝ որոշ մարդականց ձեռքը տրվում են… շատ հասկանալի «բաներ», որպեսզի ձայն չհանեն: Եվ այդ մարդիկ չեն կարող ինչ-որ մանր չինովնիկներ լինել, նրանց չինը հասկանալիորեն գնում-հասնում է շատ վերև: (Կարող էինք գրել՝ «ընդհուպ մինչև», սակայն չենք գրում, որովհետև ՀՀ ո՛ր մի քաղաքացին կամ ընթերցողը չգիտի, թե ովքեր են «ընդհուպները»):

Բայց անօրեն գործարարների հանդեպ կառավարության հեզաճկուն վերաբերմունքից ոչ միայն կաշառակերության ու կոռուպցիայի հոտ է գալիս, այդ վերաբերմունքը նաև ցույց է տալիս, թե ինչ է մտածում կառավարությունը սեփական ժողովրդի մասին: Իսկ կառավարությունը սեփական ժողովրդի մասին շատ վատ կարծիք ունի, որովհետև նույն ժողովրդին անուղղակի մեղադրում է ստվերային գործունեություն ծավալածների հանդեպ տածած աներևակայելի մեծ սիրո և հանդուրժողականության մեջ:

Դատեք ինքներդ` վերոնշյալ փոխնախարարը չի բացառել, որ ստվերից հարկային դաշտ եկող գործարարները իրենց կորուստները կփորձեն կոմպենսացնել ապրանքներն ու ծառայությունները ժողովրդի վրա ավելի թանկ ծախելու գնով: Հետևաբար, ժողովրդի համար ավելի լավ է, որ նրանք շարունակեն մնալ… ստվերում:

Սիրու՜մ է մեր ժողովուրդը ստվերը: Ահա այսպիսի տխուր բաներ` ֆիննախարարի տեղակալի է՛լ ավելի տխուր զրույցից: Տխուր, որովհետև մարդը նաև ահազանգ հնչեցրեց, որ կասկած ունի, թե այս տարվա բյուջեն հարկավոր միջոցներով կհամալրվի: Եթե իշխանությունն ու կառավարությունը սրանք են, իհարկե, հիմնավոր կասկած է:

Բ. Գասպարյան