Ուշիում մեծ շուքով բացվեց գյուղի մշակույթի տունը

Հունիսի 1-ին Արագածոտնի մարզի Ուշի համայնքում իսկական տոն էր: Գյուղի դպրոցի, գրադարանի, մարզադաշտի վերանորոգումից հետո վերաբացվեց մշակույթի տունը:

Ուշին իսկական վերածնունդ է ապրում, և այս ամենի «մեղավորը» Մարգար և էլիզ Շարապխանյաններն են, ովքեր յոթ տարի առաջ Կանադայի Տորոնտո քաղաքից տեղափոխվեցին Հայաստան և Ուշի գուղում հիմնեցին իրենց հայաստանյան օջախը: Թեեւ նրանք արդեն վաղուց հայաստանցիներ են և ուշեցի, չգիտես` ինչու, մեր պետական այրերը նրանց դիմում են որպես սփյուռքահայի:

Այսպես` մշակույթի տան վերաբացման առիթով ՀՀ մշակույթի նախարարը Մարգար Շարապխանյանին պարգևատրեց նախարարության շնորհակալագրով, որում նրան անվան դիմաց նշված էր «կանադահայ բարերար»:

Արագածոտնի մարզպետն էլ իր ելույթում, ի դեմս Մարգար և Էլիզ Շարապխանյանների, կարևորեց սփյուռքահայերի դերը, այնինչ` Շարապխանյանները վաղուց արդեն իրենց համարում են ուշեցիներ, և նրանց կազմակերպչական աշխատանքի շնորհիվ Ուշիում ձևավորվել է համայնք, որը փորձում է տեր կանգնել գյուղին, գյուղացու կյանքը դարձնել բարեկեցիկ :

«Երևանը Հայաստան չէ, Հայաստանն էլ Երևան չէ»,- ընդգծեց Մարգար Շարապխանյանը և հավելեց, որ առանց բարեկեցիկ գյուղի, առանց գյուղացու հնարավոր չէ ունենալ հզոր Հայաստան, ապա հայտարարեց գյուղում հաջորդ վերականգնողական աշխատանքների սկիզբը, որին մասնակցություն կունենան ինչպես Սփյուռքի իր ընկերները, այնպես էլ ուշեցիները:

Մանրամասները` տեսանյութում: