ՀՊՏՀ ուսանողները վարչապետին պատմել են, թե ինչու են բոյկոտել ուսխորհրդի նախագահի ընտրությունը

Վարչապետ, Հայաստանի պետական տնտեսագիտական համալսարանի խորհրդի (ՀՊՏՀ) նախագահ Հովիկ Աբրահամյանն այսօր ընդունել է բուհի Գյումրու մասնաճյուղի ուսանողական խորհրդի անդամներին: Հանդիպման նպատակն էր ծանոթանալ Գյումրու մասնաճյուղի ուսխորհրդի նախագահի ընտրության առնչությամբ ստեղծված իրավիճակին և լուծել խնդիրը:

Հանդիպմանը մասնակցում էր նաև ՀՊՏՀ ռեկտոր Կորյուն Աթոյանը:

Ուսխորհրդի անդամների խոսքով՝ դժգոհություն կա՝ պայմանավորված մասնաճյուղի տնօրինության կողմից կանոնադրությունում ընտրության ընթացակարգի փոփոխությամբ, որի արդյունքում ուսխորհրդի նախագահի ընտրության իրավունքը վերապահվում է պրոֆեսորադասախոսական կազմին, այլ ոչ թե ուսանողներին (ինչպես նախկինում է եղել):

Այդ պատճառով ուսանողները երկու օր առաջ բոյկոտել են ուսխորհրդի նախագահի ընտրությունը, և տնօրինությունը համաձայնվել է այն կազմակերպել ուսանողների նախընտրած կարգին համապատասխան:

Հովիկ Աբրահամյանը Կորյուն Աթոյանին հանձնարարել է բացատրություն պահանջել բուհի տնօրինությունից նման մոտեցման համար: Ըստ վարչապետի՝ անհրաժեշտ է, որ ուսխորհրդի նախագահի ընտրությունն անցկացվի ուսանողների նախընտրած կարգով: Այս մասին հայտնում է կառավարության կայքը: