2015-ին «Ոսկե ծիրան»-ի առանցքում Ցեղասպանության թեմայով ֆիլմերն են լինելու

2015-ին կայանալիք «Ոսկե ծիրան» միջազգային 12-րդ կինոփառատոնի առանցքում լինելու են  Ցեղասպանության 100-րդ տարելիցին նվիրված ֆիլմերը:

Լրագրողների հետ հանդիպման ժամանակ փառատոնի տնօրեն Հարություն Խաչատրյանը նշեց, որ արդեն մի քանի տարի է, ինչ իրենք գումար են հատկացնում քուրդ, թուրք, իրանցի և հայ կինոռեժիսորներին, որոնք Ցեղասպանության թեմայով ֆիլմ են նկարահանում:

«Ցեղասպանությանը նվիրված ֆիլմերից մեկով էլ կբացենք փառատոնը: Ի դեպ, այդ ֆիլմերը կցուցադրվեն նաև արտասահմանում: Ես արդեն պայմանավորվածություն ունեմ Բելգիայի, Դանիայի հետ: Փառատոնի ավարտից հետո էլ կհրատարակվի մի գիրք, որում կներկայացվեն բոլոր ֆիլմերը, որ դրսի հանդիսատեսի համար ավելի հեշտ լինի Ցեղասպանության թեմայով ֆիլմեր գտնելը»,- ասաց Խաչատրյանը` հավելելով, որ հաջորդ տարի կցուցադրվի ֆրանսահայ ռեժիսոր Ռոբեր Գետիկյանի կողմից նկարահանվող` Ցեղասպանությանը նվիրված ֆիլմը: