ՀՔԾ պաշտոնյաները մինչ այժմ ծառայողական մեքենա ունենալու իրավունք չունեին

ՀՀ Հատուկ քննչական ծառայության համար մինչ օրս սահմանված չեն եղել ծառայության  պաշտոնատար անձանց սպասարկող ծառայողական ավտոմեքենաների հատկացման, շահագործման և սպասարկման պայմանները, ինչպես նաև հաստատված չեն դրանց  սահմանաքանակները: Որովհետեւ ՀՔԾ-ն, որպես օրենքով ստեղծված առանձին պետական  մարմին, ընդգրկված չէ կառավարության 2005թ փետրվարի 17-ի  N194-Ն որոշման մեջ, որով կանոնակարգվում են պաշտոնատար անձանց սպասարկող ծառայողական մեքենաների հատկացման, շահագործման եւ սպասարկման կարգը, պայմաններն ու դրանց սահմանաքանակները:

Արդյունքում' ՀՔԾ-ին կառավարության` 2013-ի դեկտեմբերի 5-ի N1355-Ն որոշմամբ  հատկացվել է նոր ծառայողական ավտոմեքենա, եւ անհրաժեշտություն է առաջացել Հայաստանի Հանրապետության պետական բյուջեում՝ միջնաժամկետ ծախսերի ծրագրերում, նախատեսել համապատասխան ծախսեր, որոնց իրականացման համար չկա անհրաժեշտ նորմատիվային բազա:

Այդ իսկ պատճառով կառավարության վաղվա նիստում նախատեսվում է կատարել հիշյալ փոփոխությունը: