ՌԴ պատգամավորները խնդրել են Օբամային և ԵՄ-ին պատժամիջոցներ կիրառել իրենց նկատմամբ

ՌԴ Պետդումայի պատգամավորները համատեղ հայտարարություն են ընդունել, որում խնդրում են ԱՄՆ նախագահ Բարաք Օբամային և ԵՄ-ին մարտի 17-ին ընդունած պատժամիջոցներն իրենց բոլորի վրա տարածել. հայտնում է ИТАР-ТАСС-ը: Փաստաթղթի օգտին քվեարկել է 353 պատգամավոր:

«Մարտի 17-ին հերթական անգամ ԱՄՆ պետդեպարտամենտը, Օբաման ու ԵՄ-ն ոզնի վախեցնելու` անհեթեթ քայլ են ձեռնարկել …»,- ասել է Պետդումայի հասարակական միավորումների և կրոնական կազմակերպությունների գործերով հանձնաժողովի փոխնախագահ Միխայիլ Մարկելովը:

Ըստ նրա`  Ռուսաստանում գիտեն` ինչով է դա ավարտվելու: «Շատ երկրներում դրանք արդեն կիրառվել են` Սերբիայում, Բելառուսում, Սիրիայում: Սակայն այդ երկրները չեն կորցրել սեփական արժանապատվության զգացումը, չեն կորցրել իրենց ինքնությունը, նրանք մնում են միասնական անկախ պետություն»,- ընդգծել է Մարկելովը:

Հիշեցնենք, որ ԵՄ-ն և ԱՄՆ-ը մարտի 17-ին հայտնեցին  որոշ ռուսաստանցի պատգամավորների դեմ  պատժամիջոցներ կիրառելու մասին: