Խորհուրդ` տվայտանքների մեջ տոչորվող Աշոտյանին

Առաջադիմո՜ւմ է հայոց պաշտոնեական դասը: Ժամեր չէին անցել այն պատմական օրվանից, երբ «Օրինաց երկիր» կուսակցության առաջնորդ Արթուր Բաղդասարյանը «Թվիթեր»-ում էջ բացեց ու առաջին իմաստասիրական գրառումն արեց (Հեղինե Բիշարյանը մինչև հիմա չի վերծանել այդ գլուխգործոցը), կոալիցիոն խանդը բորբոքվեց ՀՀԿ-ականների մեջ` «Թվիթերը» դարձավ մոդա:

Ահավասիկ, կրթության և գիտության նախարար Արմեն Աշոտյանը ֆեյսբուքյան իր էջում մոլորվել-մնացել է: Խեղճը գրում է. «Դիմում եմ ՖԲ ընկերներիս և ծանոթներիս: Ի՞նչ եք կարծում, ո՞ր ճանապարհով արժե շարունակել իմ ցանցային շփումները:

Տարբերակ 1. Մնալ ՖԲ-ում:

Տարբերակ 2. Տեղափոխվել Թվիտտեր(https://twitter.com/Ashotyan):

Տարբերակ 3. Փորձել զուգահեռաբար ակտիվ լինել:

Կսպասեմ ձեր արձագանքներին: Կանխավ շնորհակալ եմ»:

Տվայտանքների մեջ տոչորվող կրթության ռահվիրային խոնարհաբար առաջարկում ենք 4-րդ տարբերակը` «Թվիթեր» տեղափոխվելու փոխարեն տեղափոխվել կրթության և գիտության նախարարություն և կատարել նախարարի` իր պարտականությունները: Կանխավ շնորհակալ ենք:

ՀՀ մի խումբ մանկավարժների անունից` Բ. Գասպարյան