Շուրջ 2000 նոր աշխատատեղի ակնկալիք կա

Կառավարության այսօր ընդունած որոշման համաձայն' «ԷՅ ՋԵՅ ԷՅ ՀՈԼԴԻՆԳ» ՓԲԸ-ի տարածքում կստեղծվի ազատ տնտեսական գոտի' ըստ օտարերկրյա ուղղակի ներդրումների, ոսկերչական, ակնագործական և ժամագործական ոլորտի միջազգային ընկերությունների ներգրավման միջոցով արտահանման ծավալների աճի, նոր աշխատատեղեր ստեղծելու և կայուն տնտեսական զարգացում խթանելու նպատակով: Ազատ տնտեսական գոտու գործունեության ժամկետը սահմանվել է 10 տարի:

ՀՀ էկոնոմիկայի նախարար Վահրամ Ավանեսյանի խոսքերով' նախատեսվում է ազատ տնտեսական գոտում առաջին երեք տարիների ընթացքում ներգրավել մոտ 120-150 ընկերություն, ինչի շնորհիվ, ըստ նախնական ակնկալիքների,  կստեղծվեն շուրջ 2 հազար նոր աշխատատեղեր եւ կապահովվի տարեկան շուրջ 200-250 մլն դոլարի արտադրանքի արտահանում:

«Ընդհանուր առմամբ, ներդրումների ծավալը կազմում է շուրջ 10 միլիոն դոլար: Մենք ակնկալում ենք, որ վերջնականորեն ծրագիրը հաստատելուց հետո արդեն իսկ ամբողջովին ազատ տնտեսական գոտին կսկսի գործել մինչեւ 2015 թվականը»,- նշեց Վահրամ Ավանեսյանը:

Անդրադառնալով այս հարցին' վարչապետ Տիգրան Սարգսյանը նշեց, թե կառավարությունն այս աշխատանքին նախապատրաստվել է բավականին երկար, հիշեցրեց, որ Երևանում տեղի ունեցավ աշխարհի ոսկերիչների մեծ համագումար, այն ժամանակ էլ այս հարցը քննարկվեց, եւ ազատ տնտեսական գոտի ստեղծելու այս նախաձռնությունը գալիս է մասնավոր հատվածից:

Ըստ վարչապետի` Հայաստանն այս արտադրաարդյունաբերական ոլորտներում' ոսկերչության, ակնագործական եւ ժամագործական, լուրջ ներուժ ունի, եւ ազատ տնտեսական գոտին հնարավորություն է տալու, որպեսզի ամբողջ աշխարհից հայերը, որ զբաղվում են այդպիսի գործունեությամբ, Հայաստանում բացեն իրենց ձեռնարկությունները:

«Դրանք, իհարկե, կլինեն փոքր ձեռնարկություններ, բայց, ինչպես նախարարը նշեց, ենթադրվում է, որ 1000-ից ավելի աշխատատեղ կստեղծվի, իսկ դա նշանակում է, որ մեծ պահանջարկ է լինելու աշխատուժի»,- շեշտեց վարչապետը: