Աշխատանքից ազատվել են այն աշխատակիցները, ովքեր բողոքի ակցիայի ժամանակ պատասխանել են լրատվամիջոցների հարցերին

Մետրոպոլիտենի երեք աշխատակցի հեռացրել են  աշխատանքային օրենսգրքի 113-րդ հոդվածի 6-րդ կետի հիման վրա` գործատուի կողմից պայմանագրի խզում աշխատակցի նկատմամբ անվստահության համար:

Այս մասին Yerkir.am-ի հետ զրույցում նշեց մետրոպոլիտենի աշխատակիցներից մեկը, ով չցանկացավ ներկայանալ` հետագա խնդիրներից խուսափելու պատճառով: Մեր զրուցակցի խուսափողական պահվածքը նաև հասկանալի է` աշխատանքից ազատված երեք աշխատակիցներից երկուսը` Անդրանիկ Գևորգյանը  և Գագիկ Գալստյանը, օրեր առաջ կայացած բողոքի ակցիայի ժամանակ հարցազրույցներ են տվել լրատվամիջոցներին, ակտիվ շփվել լրագրողների հետ և պատրաստակամորեն պատասխանել բոլոր հարցերին:

Հետևաբար, կարելի է ենթադրել, որ այդ աշխատակիցների` իրենց քաղաքացիական դիրքորոշումն արտահայտելը բնավ դուր չի եկել մետրոպոլիտենի ղեկավարությանը, թեեւ բոլոր հիմնարկների աշխատակիցների բողոքն ուղղված է ոչ թե հիմնարկներիղեկավարության, այլ կառավարության ընդունած` պարտադիր կուտակային կենսաթոշակային օրենքի դեմ:

Մեր զրուցակիցը նշեց, որ մետրոպոլիտենի ղեկավարությունը չի մանրամասնում, թե ինչ պատճառով է այդ երեք աշխատակիցներին ներկայացվել անվստահության հիմքը: Երեքն էլ մետրոպոլիտենի` 12 և 15 տարվա փորձ ունեցող աշխատակիցներ են: