Հայ Դատի հանձնախումբը կոչ է արել թույլ չտալ Ալիևին միջամտել ԱՄՆ-ի հասարակական կյանքին

ՀՅԴ Ամերիկայի Հայ Դատի հանձնախումբը բաց նամակով դիմել է ամերիկացի օրենսդիրներին՝ կոչ անելով բողոքել Ադրբեջանի նախագահ Իլհամ Ալիևի` ԱՄՆ-ի հասարակական կյանքին միջամտելու դեմ. հայտնում է Asbarez-ը:

Հանձնախմբի գործադիր տնօրեն Արամ Համբարյանը նամակում հիշեցնում է, որ Իլհամ Ալիևը  աշխարհին հայտնի է` մարդասպան Ռամիլ Սաֆարովին ներում շնորհելով ու նրա սպայական կոչումը բարձրացնելով:

Համբարյանը նշում է, որ ամերիկյան ժողովրդավարական ավանդույթների հետևանքն է, որ նույնիսկ Իլհամ Ալիևի կոռումպացված ռեժիմի պես ռեժիմը  կարող է ազատորեն գործել ամերիկյան հասարակության ներսում:

«Սակայն դա չի նշանակում, որ ամերիկացիները պետք է լռեն նման ղեկավարների միջամտությունների դեմ, նրանք չեն հարգում մեր իրավունքներն ու չեն կիսում մեր արժեքները»,- նամակում գրել է նա:

«Մեր` ամերիկյան ժողովրդավարության ոգուն համապատասխան` խնդրում եմ` թույլ չտալ այդ բռնակալին գրավել մեր նահանգի օրենսդիր ժողովը իր՝ ՀՀ-ի եւ ԼՂՀ անկախ ժողովուրդների դեմ ուղղված արշավի համար»,- եզրափակել է Համբարյանը: