Միակ մեխանիզմը ժողովրդի օգնությամբ հանցագործ իշխանության ականջը կամ չգիտեմ էլ ինչը ձգելն է. Լեւոն Զուրաբյան

ԱԺ ավանդական ճեպազրույցում ԱԺ ՀԱԿ խմբակցության ղեկավար Լևոն Զուրաբյանը նշեց, որ բոլորը տեսան` ընդդիմության միասնականությունը տալիս է լուրջ արդյունքներ նաև խորհրդարանում: «Անցյալում քաղաքական մեծամասնությունն էր թելադրում օրակարգ, որը չէր բխում ժողովրդի շահերից, բայց ընդդիմության միասնականությունը հնարավորություն է տալիս կազմակերպելու արտահերթ քննարկումներ և թելադրելու օրակարգ ԱԺ-ին: Քառօրյայի ամենակարևոր արձանագրումն այն է, որ մենք գործ ունենք մի կառավարության հետ, որը որդեգրել է Սահմանադրության խախտումը, գաղտագողի գործելաոճը: Կառավարությունն այլևս վախենում է լուրջ հարցեր բերել ԱԺ: Դրա մասին են վկայում գազային գործարքները և «Որոտան» կասկադի վաճառքը: Այնպես որ` քաղաքական ընդդիմությունը շարունակելու է առաջ շարժվել: Բայց որ խոշտանգեք էլ, չեմ ասի, թե հաջորդ քայլերը որոնք են լինելու, բայց այդ քայլերը լինելու են»,- հայտարարեց Զուրաբյանը:

Ըստ պատգամավորի` «Որոտան» կասկադի վաճառքի վերաբերյալ կառավարությունը, մասնավորապես` արդարադատության նախարարը փորձել է հարցուպատասխանի ժամանակ ներկայացնել իրավական հիմնավորումներ, որոնք իրավաբանության հետ որևէ կապ չունեն: «Այս գործարքի առումով նա վարվել է որպես մի «ժուլիկ»,- նշեց Զուրաբյանը:

Հարցին, թե ինչպե՞ս է հնարավոր պատասխանատվության ենթարկել կառավարությանը նման որոշումների համար, պատգամավորը պատասխանեց, որ մի քաղաքական ուժ, որը որդեգրել է Սահմանադրության խախտումը, այնքան էլ պարզ չէ, թե ինչպես պետք է պատասխանատվության ենթարկվի:

«Միակ միջոցը ժողովրդով նրանցից հաշիվ պահանջելն է, որովհետև իրավական մեխանիզմ ուղղակի գոյություն չունի: Մաթեմատիկական ճշգրտությամբ կարող ենք ապացուցել, որ Սահմանադրություն է խախտվել, բայց ԱԺ-ն աչք կփակի դրա վրա: Կառավարությունն անում է այն, ինչ ուզում է: Տեսականորեն կարելի է դիմել դատարան, բայց եթե ես նման միտք արտահայտեմ, բոլորիդ ծիծաղը կգա: Ուրեմն` միակ մեխանիզմը ժողովրդի օգնությամբ այդ հանցագործների ականջը կամ չգիտեմ էլ ինչը ձգելն է»,-նշեց Զուրաբյանը: