Սոչիի հյուրանոցային համարների լոգարաններում տեսահսկող սարքեր են տեղադրված

ՌԴ փոխվարչապետ Դմիտրի Կոզակը արևմտյան լրագրողների հետ զրույցում բերանից թռցրել է, թե Սոչիի հյուրանոցային համարների լոգարաններում տեսահսկող սարքեր են տեղադրված. հայտնում է Лента.ру-ն՝ վկայակոչելով The Wall Street Journal-ը:

Մեկնաբանելով Սոչիի ենթակառուցվածքների թերությունների մասին` արևմտյան ԶԼՄ-ներում պարբերաբար հայտնվող տեղեկությունները՝ նա ասել է, որ դրանք հայտնվում են Ռուսաստանի հանդեպ բացասական  վերաբերմունքի պատճառով:

«Մենք տեսախցիկների տեսագրություններ ունենք, որոնք ցույց են տալիս՝ ինչպես են մարդիկ բացում ցնցուղը, այն ուղղում պատի կողմը և այնուհետ հեռանում սենյակից»,- հայտարարել է Կոզակը:

Լրագրողները փորձել են նրանից տեսահսկման մասին մանրամասներ ստանալ, սակայն Կոզակը հայտարարել է, որ մամուլի ասուլիսն ավարտված է: