Բոլորն են պարտավոր ծառայել. Մկրտիչ Մկրտչյան

Մենք ունենք մի շարք խնդիրներ` սոցիալական վիճակը, անարդար կյանքը, բարոյապես եւ հոգեպես աղճատված միջավայրը, բայց այս ամենը ոչինչ չարժե, եթե հայրենիքիդ անվտանգության հարցը կա, եթե կարող ենք օտարի ձեռքով կորցնել պետությունը. Yerkir.am-ի հետ զրույցում կարծիք հայտնեց ազատամարտիկ, երգիչ Մկրտիչ Մկրտչյանը /Մակիչ/:

Ըստ նրա` բանակը մեր անկախության գլխավոր ձեռքբերումն է, մեր պետության կայացման հիմքը:

«Յուրաքանչյուր հայ, եթե գիտակցում է մեր այսօրվա քաղաքական իրավիճակը, մեզ իշխող պետությունների խաղերը, չի կարող բանակի կողքին չլինել: Ազատության հրապարակում մեր ընկերները բողոքի ակցիա են անում, եւ միգուցե արդարացի է իրենց պահվածքը, իրենց պահանջածը, սակայն խարխլում են մեր պետությունը: Նրանց մեջ ազնիվներ էլ կան, որ չեն էլ պատկերացնում, որ միգուցե դա դավ է պետության համար` մեկ ուրիշ պետության կողմից կազմակերպված: Մեր պատմության ամենակարեւոր շրջանն է հիմա եւ պետք է կարողանանք նեցուկ կանգնել մեր բանակին, պետությանը»,- ասաց Մկրտչյանը` հավելելով, որ բանակը մեր պետության սյունն ու հենարանն է:

Նրա կարծիքով` նրանք, ովքեր խուսափում են բանակից առողջական խնդիրների պատճառով, նորմալ է, բայց ցավալին այն է, որ կան նաեւ տղաներ, որոնք ուղղակի խուսափում են ծառայել. «Դա մեր ազգի ամենամեծ թերություններից մեկն է: Ամեն հայ պարտավոր է ծառայել` կուզի գիտնական լինել, մշակույթի գործիչ, թե բժիշկ: Բանակը բոլորի համար է»: