Պետությունը Հրանտ Դինքին չպաշտպանեց, սպառնաց. թուրք կուսակցապետ

Թուրքիայի «Խաղաղություն և ժողովրդավարություն» կուսակցության նախագահ Սելահաթթին Դեմիրթաշը կուսակցության խմբի հետ հանդիպման  ժամանակ անդրադարձել է պոլսահայ լրագրող Հրանտ Դինքի սպանությանը. հայտնում է Agos-ը:

«Հրանտ Դինքի սպանություն մասին խոսելիս խոսում ենք մի սպանության մասին, որը պետական հիմնարկները եւ համապատասխան բոլոր կառույցները ուղղակիորեն կամ անուղղակորեն դրդել են կամ աչք փակել դրա վրա: Թեեւ Հրանտի ստացած սպառնալիքների մասին Տրապիզոնի ոստիկանությունը բացահայտ տեղեկացրել էր Կ.Պոլսի ոստիկանությանը, սակայն Հրանտին չէին պաշտպանել: Մի կողմ թողեք պաշտպանելը,  փոխնահանգապետը նույնիսկ սպառնացել էր Հրանտին: Նրա մի հոդվածի համար սպառնացին` «զգուշացիր քայլերիցդ»:

Հրանտին սպանելուց հետո նույն մարդասպանի մտածելակերպով շարունակեցին սպանել նրան: Այդ ժամանակ Կ.Պոլսի փոխնահանգապետը շատ «հաջող» գործած պետք է լիներ, որ նրան նշանակեցին պատգամավոր, ապա` ներքին գործերի նախարար»,-ասել է Դեմիրթաշը:

«Սակայն Հրանտի ընտանիքն արդեն պետք է հասկացած լինի, որ այս դատավարությունից արդարություն պահանջելն անիմաստ է: Այդ իսկ պատճառով նրանք հայտնել են, որ այսուհետ ներկա չեն գտնվի դատավարությանը»,- հավելել է նա: