Վարդան Ղուկասյանի առանձնատունը չեն խուզարկել

«Առավոտ» թերթը գրել է. «Ոստիկանությանը մոտ կանգնած աղբյուրները երեկ «Առավոտին» փոխանցեցին, որ ոստիկանության հանցագործության դեմ պայքարի 6-րդ վարչության աշխատակիցները մանրակրկիտ խուզարկել են Գյումրիի նախկին քաղաքապետ Վարդան Ղուկասյանի առանձնատունը: Մեծ թվով ոստիկաններ լցվել են Սլաբոդկա թաղամաս, որտեղ ապրում է նախկին քաղաքապետը: Վերջիններս մոտ կես ժամ այնտեղ մանրակրկիտ խուզարկում են անցկացրել»:

Yerkir.am-ը ոստիկանությունից փորձեց պարզել, թե ո՞րն է եղել նախկին քաղաքապետի առանձնատունը խուզարկելու շարժառիթը, սակայն մեզ հետ զրույցում ոստիկանության հասարակայնության հետ կապերի և լրատվության բաժնի աշխատակից Արմեն Մալխասյանը հերքեց այս լուրը` նշելով, որ այն իրականությանը չի համապատասխանում: