Սերունդների համերաշխության սկզբունքից մենք հրաժարվում ենք. Տիգրան Սարգսյան

Կենսաթոշակային ռեֆորմն առնվազն 35 տարվա հաշվարկ է ենթադրում: Այս մասին այսօրվա ասուլիսի ժամանակ ասաց ՀՀ վարչապետ Տիգրան Սարգսյանը:

Նա նշեց, որ այս ռեֆորմի վրա աշխատել են 10 տարի, հրավիրել են աշխարհի լավագույն մասնագետներին: «Մեր մասնագետները տարբեր երկրներ են այցելել: Նախապատրաստական աշխատանքի ընթացքում բոլոր նրբությունները հաշվի են առնվել: Ինչպես վատ ուսանողը քննությունից մի քանի ժամ առաջ է պատրաստվում. մարդիկ սկսեցին նոր հաշվել, թե ինչ է տեղի ունենալու իրենց եկամուտների հետ»,- նշեց Տիգրան Սարգսյանը:

Նա ասաց, որ այլընտրանք չունենք` սերունդների համերաշխության սկզբունքից մենք հրաժարվում ենք: «Այսօրվա թոշակային համակարգը արդար համակարգ չէ: Պետությունն ասում է` սիրելի' երիտասարդներ, դուք պետք է կուտակեք, որ անցնեք ապահով ծերություն: Տրամաբանությունը շատ պարզ է, սա լավագույն լուծումն է»,- հավաստիացրեց վարչապետը:

Նա վստահ է, որ համակարգի ներդրման հարցում հաջողություն ենք ունենալու եւ կրկին  ԱՊՊԱ-ի օրինակը բերեց, որը քննադատում էին, բայց տեսանք, որ լավն է:

Խոսելով կուտակային ֆոնդի կառավարիչների մասին` վարչապետն ասաց, որ խաղի կանոնները սահմանված են ՀՀ օրենսդրությամբ եւ համապատասխանում են միջազգային լավագույն փորձին, որն է` ապահովել հուսալիությունը, հետևել, որպեսզի այն հիմնադրամները, որոնք այսօր արտոնագրեր են ստացել, համապատասխանեն չափորոշիչներին:

Ուշագրավ է, որ Տիգրան Սարգսյանը չկարողացավ տեղեկություններ տրամադրել, թե,  ի վերջո, որոնք են կենսաթոշակային միջոցների կուտակման երկու կառավարիչները, միայն նշեց, որ նրանք բարձր վարկանիշ ունեն, եւ որ նախարարները հավելյալ տեղեկություն կտրամադրեն:

Անդրադառնալով ռիսկերին` Տիգրան Սարգսյանն ասաց. «Հավանականությունը, որ կկորցնեք ձեր կուտակած գումարը, մոտ է զրոյի»: