"Գրոսմայստեր" Պուտինը քաղաքական դաս տվեց Օբամային

Եթե Բարաք Օբամայի համար անցնող տարին քաղաքականության տեսանկյունից ահավոր էր, ապա Վլադիմիր Պուտինի համար այն բավականին  բարեհաջող էր: Այդ մասին գրում է Global Research-ի լրագրող Մայքլ Վերբովսկին: Նա նշում է, որ Կրեմլն այս տարի «գրոսմայստերի մակարդակ» ցույց տվեց:

Ըստ լրագրողի՝ Օբամայի քաղաքականությունը Մերձավոր Արևելքում ցույց տվեց նրա ողջ «թուլությունը և անորոշությունը»: Սիրիական պատերազմից, ըստ Վերբովսկիի, հաջողվեց խուսափել միայն Ռուսաստանի շնորհիվ:

«ԱՄՆ-ին մեծ վնաս հասցրեց նաև Էդվարդ Սնոուդենը: Տուժեցին անգամ Վաշինգտոնի և Բեռլինի  հարաբերությունները: Իսկ Պուտինն այդ ժամանակ փայլում էր միջազգային հարթակներում: Նա անգամ հանդիպում ունեցավ «Տարվա մարդ» ճանաչված Հռոմ պապի հետ: Ով գիտի, գո՞ւցե հաջորդ տարի հենց Պուտինը «Տարվա մարդ» կճանաչվի: Բացի այդ` Կրեմլին հաջողվեց հասնել այն բանին, որ Իրանը կրճատեց միջուկային զենքի ծրագիրը և հաշտվեց Արևմուտքի հետ»,- գրում է Վերբովսկին:

Ըստ լրագրողի՝ մեծ նշանակություն ուներ նաև Պուտինի հայտարարած` այլախոհների համաներումը:

Հեղինակի կարծիքով՝ ԱՄՆ նախագահի երկրորդ ժամկետը ավարտին է մոտենում, և սա նշանակում է, որ նա նույնպես պետք է մտածի ներում շնորհելու` մարդասիրական քայլի մասին: «Նման իրավիճակում չի բացառվում, որ Էդվարդ Սնոուդենը նույնպես կարող է ներում ստանալ»,- գրում է  նա: