Երրորդ անձանց տրորելով՝ փորձում էր հասնել իր նպատակներին. փաստաբանը՝ Բագրատյանի մասին

Ֆիզմաթ գիտությունների դոկտոր, ՀԱԿ նախկին անդամ Մանե Հակոբյանի փաստաբան Սեդրակ Ասատրյանը նախկին վարչապետ, ՀԱԿ պատգամավոր Հրանտ Բագրատյանին հորդորում է ցեխ չշպրտել Concern Dialog փաստաբանական ընկերությունի վրա՝ իրեն նույնացնելով իր վստահորդի հետ:

Հիշեցնենք, որ Մանե Հակոբյանը Բարատյանին դատի էր տվել իր գիտական ծրագիրը գողանալու համար, ինչին պատգամավորը պատասխանել էր հակընդդեմ հայցով: Արաբկիրի և Քանաքեռ-Զեյթունի ընդհանուր իրավասության դատարանի դատավոր Սիմիզար Հովսեփյանը բավարարել էր հայցը և Բագրատյանին արգելել Մանե Հակոբյանի ստեղծագործության տարածումը, փոփոխությունն ու տարածումը, Բագրատյանից գանձվել էր 1 մլն դրամ՝ որպես փաստաբանի վարձատրության գումար, իսկ հակընդդեմ հայցը մերժվել էր: Պատգամավորը առաջին ատյանի դատարանի վճիռը բողոքարկել էր ՀՀ վերաքննիչ դատարանում, որը, սակայն, դեկտեմբերի 4-ին մերժվել էր:

Բագրատյանի խոսքով՝ իր դեմ հարուցված գործի հետևում կանգնած է կառավարությունը, մասնավորապես` նա շեշտել էր այն հանգամանքը, որ Goncern Dialog փաստաբանական ընկերությունը պատկանում է արդարադատության նախարարությանը:

Փաստաբանը նշեց, որ չի թաքցնում` արդարադատության փոխնախարար Արամ Օրբելյանն իրենց ընկերության բաժնետեր է, բայց նա կառավարմանը չի մասնակցում, նա հավաստիացրեց, որ բաժնետոմսերի 70%-ն իրենն է:  «Ներեցեք` եթե ես վերցնում եմ իմ հաճախորդի գործը, ես չեմ նայում` նա ինչ կուսակցության անդամ է կամ կառավարության հետ կապ ունի՞, թե՞ ոչ»,- ասաց նա և հավելեց. «Հասկանում եմ Բագրատյանի ունեցած ավանդը մեր երկրում. նա այն ժամանակ,  երրորդ անձանց տրորելով, փորձում էր հասնել իր նպատակներին: Եթե նա հիմա էլ է դա ցանկանում, թույլ չենք տա, ցեխ շպտելով մեր գրասենյակի վրա, կասկածի տակ դնել մեր գործունեությունը»:

Նախկին ՀԱԿ անդամ Մանե Հակոբյանն էլ հայտարարեց, որ իր ծրագրի առաջին գրագողը եղել է ՀԱԿ-ի գիտության հարցերով կոորդինատոր Սամվել Կարաբեկյանը, սակայն քանի որ իր ֆեյսբուքյան էջում այն հրապարակել էր միայն Հրանտ Բագրատյանը, ինքը նրան է դատի տվել: Հակոբյանը նաև հայտարարեց, որ սա հեղինակային իրավունքի պաշտպանության առումով շահած առաջին գործն է, և ինքը բոլորի հետ պետք է պայքարի, որ իր ծրագիրը դառնա պետական ծրագիր: «Դա մեր երկրի թռիչքային զարգացման հնարավորությունն է»,- ասաց նա: