Պաշտպանի արձանագրած խախտումներն արդարադատության ոլորտում

ՀՀ Մարդու իրավունքների պաշտպանի տեղակալ Գենյա Պետրոսյանն այսօր ամփոփ ներկայացրեց դատական համակարգում գործող կոռուպցիոն մեխանիզմների, ապօրինությունների և երկակի ստանդարտների կիրառման փաստերի վերաբերյալ արտահերթ զեկույցը, որում անդրադարձ է կատարվել Վճռաբեկ դատարանին, Արդարադատության խորհրդին, դատավորներին կարգապահական պատասխանատվության ենթարկելուն և այլ հարցերի:

Այսպես` ըստ զեկույցի՝ Վճռաբեկ դատարանի դատավորների նկատմամբ կարգապահական վարույթ չի հարուցվել այնպիսի խախտումների դեպքում, որոնց համար վարույթ է հարուցվել ստորադաս ատյանի դատավորների նկատմամբ:

Դատավորի կողմից գործի քննության խելամիտ ժամկետների խախտման` ակնհայտորեն տարբեր դեպքերում Արդարադատության խորհուրդը դատավորների նկատմամբ կիրառել է նույն կարգապահական տույժը:

Դատավորի կողմից չպատճառաբանված դատական ակտ կայացնելու` նույնաբովանդակ դեպքերով Արդարադատությն խորհրդի կողմից տրվել են երկու բացահայտ իրարամերժ լուծումներ:

Թվով 15 գործերով դատավորի կողմից ողջամիտ ժամկետների անհամեմատ ավելի կոպիտ խախտման համար Արդարադատության խորհուրդը կրկին համաչափ է համարել նույն՝ «նախազգուշացում» կարգապահական տույժը:

Դատավորների կողմից, ըստ էության,  նույնաբովանդակ խախտումներ թույլ տալու համար Արդարադատության խորհուրդը առանց հիմնավորելու կիրառել է կարգապահական տույժի տարբեր տեսակներ:

Այս և բազմաթիվ խախտումներ պաշտպանն արձանագրել է 77 էջից բաղկացած զեկույցում: